Aziýa oýunlarynyň guramaçylyk komiteti ýaryşlaryň resmi gimnini hödürledi
Hançžouda 23-nji sentýabrdan 8-nji oktýabra çenli geçiriljek Aziýa oýunlarynyň öňüsyrasynda guramaçylar ýaryşlaryň resmi gimnini hödürlediler. Ol “Biziň paýlaşýan söýgimiz” atly dostlugyň, parahatçylygyň we sport ruhynyň gymmatlyklaryna bagyşlanan aýdym boldy.
Şeýle hem sylaglamak üçin gül desseleri, medallar üçin podnoslar we münber hödürlendi.
Bu atributlaryň hemmesi Hançžou medeniýetiniň lotoslar, merjenler we aýyň yşygy ýaly däp bolan böleklerini döwrebap tehnologiýalar we materiallar bilen sazlaşdyrýan stilde ýerine ýetirilen.
Guramaçylar Aziýa oýunlarynyň eýesi bolan şäher hökmünde Hançžounyň ajaýyplygyny we gözelligini görkezmek isleýändiklerini beýän etdiler. Her dört ýyldan geçirilýän Aziýanyň iri sport wakasy ilkibaşda 2022-nji ýyla meýilleşdirilýärdi. Ýöne Covid-19 pandemiýasy sebäpli ony 2023-nji ýyla geçirdiler.
Oýunlaryň geçirilmeli esasy ýeri Hançžou – Çžeszýanyň paýtagty we Hytaýyň iň gözel we ösen şaherlerinden biri bolar. Hançžoudan başga-da oýunlar Ninbo, Wençžou, Szinhua, Şaosin we Huçžouda geçer. Hançžoudaky Aziýa oýunlaryna 45 ýurtdan 12 müňe golaý, şol sanda wekiliýeti 104 adamdan ybarat bolan Türkmenistandan türgenleriň gatnaşmagyna garaşylýar.
Hançžouda Aziýa oýunlary tutuş sebit we dünýä sporty üçin açyk we ýatdan çykmajak waka bolar. Olar guramaçylygyň, howpsuzlygyň we ekologiýanyň ýokary derejesini görkezip, şeýle hem Aziýa ýurtlarynyň we halklarynyň arasynda dostluk gatnaşyklaryny ösdürmäge kömek eder.
ORIENT news
