Hytaýda gazylyp alynýan ýangyç serişdeleri ulanmazdan energiýa önümçiligi artdy
Hytaý ekologiýa taýdan arassa, energiýa çeşmeleri bolan ýelden, günden we suwdan alynýan energiýa önümçiligini artdyrýar. Munuň şeýledigine Hytaýyň elektroenergetika meýilnamalaşdyryş we taslama institutynyň mälim eden hasabaty hem aýdyň görkezýär.
Hytaý 2022-nji ýylda ýelden 762,4 milliard kilowat sagat elektrik energiýasyny alypdyr. Bu ondan ozalky ýyldakydan 16,3 göterim ýokarydyr. Geçen ýyl Hytaý fotoelektrik energiýa önümçiligini hem 30,4 göterim ýokarlandyryp, bu babatdaky ýyllyk görkezijini 425,1 milliard kilowat sagada ýetirmegi başardy.
Hytaý soňky ýyllarda elektrikenergiýasynyň arassa görnüşlerine işjeň geçýär. Geçen ýylda bu döwlet kömür arkaly işleýän elektrik stansiýalarynyň umumy önümçilikdäki paýyny 43,8 göterim peseldip, gazylyp alynýan serişdeleri ulanmazdan energiýa önümçiliginiň paýyny 49,6 göterim artdyrdy.
Şeýlelikde, Hytaýda öndürilen umumy 8,7 trillion kilowat sagat elektrik energiýanyň 36,2 göterimi gazylyp alynýan energiýa serişdelerini ulanmazdan öndürilýär. Bu görkezijiler Hytaýyň energetikasynyň çat depginde arassa görnüşlere geçýändigini görkezýär.
ORIENT news
