Halkara arheologiýa ekspedisiýasy Marguşda gözleg işlerini alyp barýar
Sentýabr aýynda halkara arheologiýa topary gadymy Marguşyň çäklerinde gazuw-agtaryş işlerini gaýtadan dikeltdi. Bu barada Italiýanyň Türkmenistandaky ilçihanasy özüniň sosial ulgamlarynda mälim edýär.
Ortaýer deňiz we Gündogar barlaglary boýunça halkara assosiasiýanyň, şeýle hem, Berliniň Erkin uniwersitetiniň, Bolon uniwersitetiniň alymlar topary “Togolok-1” diýlen toplumda gözleg işlerini alyp bararlar. Murgap derýasynyň boýunda we 30-dan gowrak taryhy ýadygärligi bolan bu toplumda ýaşaýyş biziň eramyzdan ozal 2400 – 1950-nji ýyllarda gülläp ösüpdir. Murgap derýasynyň suwunyň çekilmegi bilen gadymy ýaşaýjylar bu ýerleri terk edipdirler.
“Togolok-1” toplumyndaky arheologiki gözlegler Bolon uniwersitetiniň medeniýet we onuň taryhy departamentiniň, Ortaýer deňiz we Gündogar barlaglary boýunça halkara assosiasiýanyň, “L’Orientale” Neapolitan uniwersitetiniň, Italiýanyň Daşary işler we hyzmatdaşlyk ministrliginiň maliýe goldawy bilen, Türkmenistanyň Medeniýet ministrliginiň we Italiýanyň ýurdumyzdaky ilçihanasynyň hyzmatdaşlygynyň çäklerinde durmuşa geçirilýär.
Arheologiýa işleri 4 hepdeläp oktýabr aýynyň ortalaryna çenli dowam eder.
ORIENT news
