Owganystan TOPH taslamasyny durmuşa geçirmek üçin tagallalary dowam etdirer
“TAPI Pipeline Company Ltd” kompaniýasynyň Baş direktory Muhammetmyrat Amanow Owganystanyň dag magdan senagaty we nebit ministriniň wezipesini ýerine ýetiriji Şahabuddin Delawar bilen duşuşdy. Onda Türkmenistan – Owganystan – Pakistan – Hindistan gaz geçiriji taslamasynyň durmuşa geçirilişiniň barşy ara alnyp maslahatlaşyldy diýip, “TOLO” habarlar agentligi mälim edýär.
Duşuşygyň dowamynda taraplar taslamany doly durmuşa geçirmek boýunça tagallalary etmäge taýýardyklaryny tassykladylar. Owganystanyň ministri Kabul tarapynyň Merkezi Aziýadan Günorta Aziýa gaz geçiriji taslamany geçirmek boýunça tagallalary dowam etdirjekdigini belledi.
Kompaniýanyň Baş direktory geçen ýylyň sentýabr aýynda hem şeýle duşuşygy geçiripdi. Şonda Owganystanyň Hökümeti gaz geçiriji taslamany doly goldaýandygyny mälim edipdi.
Häzirki wagta çenli “TAPI Pipeline Company Ltd” kompaniýa türkmen tarapyndan “Türkmengaz” döwlet konserni, owgan tarapyndan Owganystanyň Gaz korporasiýasy, pakistan tarapyndan “Inter State Gas Systems (Private) Limited” kompaniýasy we hindi tarapyndan hem GAIL kompaniýasy esaslandyryjylar bolup çykyş edýär.
ORIENT news
