“Samsung Food” türkmen işleklisini nähili taýýarlamalydygyny öwredýär
Adybir kompaniýa “Samsung Food” hyzmatyny dünýä möçberinde ulanyşa goýberýändigini mälim etdi. Ol emeli intellekte esaslanyp, tagamlary we nygmatlary nähili taýýarlamalydygyny öwredýän hyzmatdyr. Oňa şu gün türkmen milli tagamy – işlekliniň taýýarlanyşy hem girizildi.
Bu hyzmat dünýäniň 104 döwletinde 8 dilde elýeterlidir. Ulanyja 160 müň sany tagamyň taýýarlanyşy we her bir tagam barada maglumat elýeterlidir. Ol her bir ulanyja gündelik iýmit meýilnamasyny nähil düzmelidigini hem öwredip, gerekli önümleri onlaýn sargyt etmäge şert döredýär.
Hyzmat tagamyň taýýarlanyşyny ädimme-ädim öwredip, naharyň düzüminde ortaça näçe kaloriýanyň, belogyň we witaminleriň bolýandygy baradaky malumatlary özünde saklaýar. Tagamlaryň taýýarlanyşyny öwretmekde kompaniýa “Whisk” işläp taýýarlamasyny ulandy. Bu iýmit platformasyny kompaniýa 2019-njy ýylda satyn alypdy.
“Food AI” tehnologiýasyny ulanmak arkaly düzülen hyzmat ulanyjynyň islegine we möwsümleýin ýagdaýlara görä, tagamlary saýlap berýär.
“Samsung” kompaniýasy geljekde “Samsung Food” hyzmatyna dürli öý hojalyk tehnikalaryny, şol sanda “Bespoke” mikrotolkunly peji birikdirmegi meýilleşdirýär. Geljekde bu hyzmata “Samsung Health” hyzmatyny hem goşmak göz öňünde tutulýar. Şeýle edilende, ol sagdyn iýmitlenmek ýörelgelerine ulanyjylaryň eýermeklerine ýardam eder.
ORIENT news
