Dogan şäherler Astrahan we Türkmenbaşy gatnaşyklary ösdürmek üçin wekiliýet çalşygyny ederler
Astrahan welaýatynyň gubernatory Igor Babuşkin we Balkan welaýatynyň häkimi Hojamyrat Aşyrmyradow onlaýn duşuşyk geçirip, hyzmatdaşlygyň geljegi uly ugurlaryny ara alyp maslahatlaşdylar.
Duşuşyga Russiýa tarapyndan Astrahan welaýatynyň premýer-ministriniň orunbasary Denis Afanasýew, sebitiň daşary gatnaşyklar ministri Wladimir Golowkow, sebitiň senagat, söwda we energetika ministriniň orunbasary Mihail Kabakow gatnaşdy. Türkmenistandan - Türkmenbaşy halkara deňiz portunyň başlygynyň wezipesini wagtlaýyn ýerine ýetiriji Seýitguly Baýseýidow, Türkmenistanyň Senagatçylar we telekeçiler birleşmesiniň Balkan welaýaty boýunça müdiri Batyr Ýusubow gatnaşdylar.
Igor Babuşkin, Türkmenistanyň Astrahan welaýaty üçin esasy halkara hyzmatdaşlaryndan biridigini belledi diýip, Russiýanyň AW gubernatorynyň edarasynyň metbugat gullugy habar berýär.
«Biziň söwda, logistika, senagat, medeniýet we bilim ugurlarynda köp bilelikdäki taslamalarymyz bar. Balkan welaýatynyň olaryň durmuşa geçirilmegine işjeň gatnaşyp biljekdigine ynanýaryn», — diýip gubernator nygtady.
Welaýatyň ýolbaşçysy, Demirgazyk-Günorta ITC-iň iň möhüm gatnaşyjysy bolan Astrahan welaýaty üçin Hazar deňzinde ýük daşamagyň ösüşiniň aýratyn möhümligini belledi. Muňa Astrahan welaýatynyň portlary bilen Türkmenbaşy halkara deňiz portunyň arasynda yzygiderli gämi gatnawynyň ýola goýulmagy ýardam eder. Hyzmatdaşlygyň möhüm ugry hökmünde gämi gurluşygy atlandyryldy.
«Gämi gurluşykçylarymyz, türkmen kärdeşleri bilen senagat hyzmatdaşlygy şertleri boýunça buýrumalary ýerine ýetirmäge taýýar», – diýip belläp, sebitiň başlygy Astrahan zawodlarynyň gämileriň göwresini ýygnap biljekdigini, soň olary Türkmenbaşy portuna äkidilip «Balkan» zawodynda doly enjamlaşdyrylyp boljakdygyny kesgitledi.
Geljegi uly ugur syýahatçylyk pudagynda hyzmatdaşlykdyr. «Maňa birnäçe gezek «Awaza milli syýahatçylyk zolagyna baryp görmek miýesser etdi», – diýip Babuşkin aýtdy. – Geografiki taýdan ol daşary ýurt şypahanalarynyň köpüsine garanyňda Russiýanyň günortasyna has ýakyn ýerleşýär. Astrahandan Türkmenbaşy şäherine uçuş bir sagada golaý wagt alar».
Şunuň bilen baglylykda gubernator bu ugurdan yzygiderli uçuşlary açmak we Awazadaky rus syýahatçylary üçin wiza düzgünini ýeňilleşdirmek meselesini gozgady. Mundan başga-da, 2024-nji ýylda Hazar deňziniň boýunda, şol sanda Türkmenistana çagyryşlar bilen syýahatçylyga başlajak häzirki zaman amatly «Beýik Pýotr» gämisiniň gurluşygy hem tamamlanýar.
Türkmenbaşy halkara deňiz portunyň başlygynyň wezipesini wagtlaýyn ýerine ýetiriji Seýitguly Baýseýidow häzirki wagtda Türkmenistanyň deňiz duralgasynda «Beýik Pýotr»-yň kabul edilmegi bilen baglanyşykly meseleleriň üstünde işleýändigini aýtdy.
Sebitara hyzmatdaşlykda häkimlikleriň aýratyn ornuny belläp, gubernator bilelikdäki işleriň ugurlaryny ara alyp maslahatlaşmak üçin wekiliýetleriň özara saparlaryny gurap dogan şäherler Astrahan we Türkmenbaşynyň arasyndaky gatnaşyklary güýçlendirmegi teklip etdi we Balkan welaýatynyň häkimini Astrahan welaýatyna çagyrdy.
Hojamyrat Aşyrmyradow, öz gezeginde, Türkmenbaşy halkara deňiz portunyň mümkinçiliklerine ünsi jemläp, ulag we logistika taslamalarynyň durmuşa geçirilişi barada jikme-jik gürrüň berdi.
Häkimiň pikiriçe, portuň ösdürilmegi Astrahan welaýaty bilen ulagt we logistika pudagynda hyzmatdaşlyga giň mümkinçilikleri açýar.
«Bu, biziň ýurtlarymyzyň we sebitlerimiziň arasyndaky söwda we ykdysady gatnaşyklaryň mundan beýläk-de ösmegine goşant goşar diýip pikir edýärin», — diýip Hojamyrat Aşyrmyradow belledi.
Astrahan welaýaty bilen Türkmenistanyň Balkan welaýatynyň arasyndaky hyzmatdaşlyk, şeýle hem Astrahan we Türkmenbaşy şäherleriniň arasynda doganlyk baradaky ylalaşyklara Türkmenistanyň Prezidenti Serdar Berdimuhamedowyň Russiýa Federasiýasyna ilkinji resmi saparynyň öňüsyrasynda, 2022-nji ýylda Moskwada gol çekildi.
ORIENT news
