Türkmenistan we Malaýziýa maglumat we aragatnaşyk tehnologiýalary pudagynda hyzmatdaşlygy güýçlendirýärler
Syýasy, diplomatik, söwda, ykdysady, energetika we ynsanperwer ugurlar boýunça köptaraplaýyn we ikitaraplaýyn hyzmatdaşlygyň köp sanly meselesi türkmen-malaýziýa daşary işler ministrlikleriň arasynda geçirilen geňeşmelerde ara alnyp maslahatlaşyldy. Duşuşyk çarşenbe güni Türkmenistanyň Daşary işler ministrliginde onlaýn ýagdaýda geçirildi diýip, ýerli Daşary işler ministrliginiň saýty habar berýär.
Diplomatlar ikitaraplaýyn gün tertibindäki mowzuklary ara alyp maslahatlaşdylar. Hususan-da, iki ýurduň arasynda ykdysady, ylmy we tehniki hyzmatdaşlyk boýunça bilelikdäki hökümetara toparyň döredilmegi barada gürrüň edildi. Şeýle hem, taraplar maglumat we aragatnaşyk tehnologiýalary we ykdysadyýeti sanlaşdyrmak babatynda türkmen-malaýziýa hyzmatdaşlygyny güýçlendirmegiň zerurdygyny bellediler.
Duşuşykda, ýurtlaryň arasynda ynsanperwerlik pudagynda syýahatçylyk, bilim, ylym we medeniýet, şeýle hem saglygy goraýyş ugurlarynda netijeli hyzmatdaşlyk etmek üçin ägirt uly tejribäniň we mümkinçiligiň bardygy nygtaldy. Diplomatlar iki ýurduň döwlet we hususy gurluşlarynyň wekilleriniň arasynda gyzyklanýan ähli ugurlarda Türkmenistan bilen Malaýziýanyň arasyndaky gatnaşyklary berkitmäge we giňeltmäge goşant goşýan bilelikdäki çäreleri geçirmek üçin gatnaşyklary güýçlendirmäge özara gyzyklanma bildirdiler.
Taraplar abraýly halkara guramalarynyň, ilkinji nobatda BMG-nyň çäginde hyzmatdaşlygy has-da ösdürmek baradaky özara niýetlerini tassykladylar. Iň ýokary derejedäki gatnaşyklaryň, şeýle hem iki ýurduň daşary işler ministrlikleriniň arasynda yzygiderli geňeşmeleriň, gatnaşyklaryň ösmeginde möhüm faktor bolup durýandygy nygtaldy.
ORIENT news
