Howanyň hilini goramak üçin Jakartanyň döwlet işgärlerini uzakdan işlemäge geçirýärler
Indoneziýanyň paýtagtyndaky döwlet işgärleriniň ýarysyndan gowragy öýünde işläp başlady. Jakartanyň häkimiýetleri şäher ýollarynda dyknyşyklary gysgaltmak we şoňa görä-de howanyň has-da hapalanmagyny azaltmak üçin şeýle adaty bolmadyk çäreleri gördüler diýip, CNN habar berýär.
Şäher häkimi, şäher işgärleriniň ýarysyny uzakdan işlemäge geçirmek barada wagtlaýyn buýruk çykardy. Şeýle çäreler hassahanalardan, halas ediş we ýangyn gulluklaryndan, jemgyýetçilik ulag ulgamynda işleýän işgärlerden başga döwlet edaralaryna degişlidir. Sentýabrdan oktýabr aýynyň ahyryna çenli şeýle işgärleriň sany 75 göterime çenli artyp biler diýip, resminamada aýdylýar.
10,5 million adamyň ýaşaýan Jakartadaky howanyň hili soňky günlerde ep-esli ýaramazlaşdy. Öňräk, Şweýsariýanyň howa derňew kompaniýasynyň işgärleri Indoneziýa megapolisini dünýäniň iň hapa şäheri diýip atlandyrdylar.
ORIENT news
