Diego Ruiz Alonso ÝB-niň ilçisi hökmünde Türkmenistanda diplomatik missiýasyny tamamlaýar
Türkmenistanyň Daşary işler ministri Raşid Meredow sişenbe güni ýurdumyzda diplomatik işini tamamlaýan Ýewropa Bileleşiginiň ilçisi Diego Ruiz Alonso bilen duşuşdy.
Daşary işler ministri Türkmenistan bilen Ýewropa Bileleşiginiň arasyndaky gatnaşyklary ösdürmäge goşan goşandy üçin ilçä minnetdarlyk bildirdi. Şol bir wagtyň özünde, Türkmenistan bilen ÝB-niň arasyndaky täsirli özara hyzmatdaşlygyň ikitaraplaýyn derejede-de, "Merkezi Aziýa - Ýewropa Bileleşigi" görnüşinde-de ösdürilendigi nygtaldy.
Şu nukdaýnazardan, diplomatlar hyzmatdaşlygyň gün tertibini ara alyp maslahatlaşdylar, degişli ugurlarda hyzmatdaşlygy ösdürmek barada pikir alyşdylar, diýip Daşary işler ministrliginiň web sahypasynda habar berilýär.
Raşid Meredow we Diego Ruiz Alonso adam hukuklary, parlamentara gatnaşyklar we "Ýewropa Bileleşigi - Türkmenistan" bilelikdäki komitetiniň gepleşikleriniň çäginde yzygiderli bilelikdäki çäreleriň möhümdigini bellediler.
Mundan başga-da, Erazmus + ýaly bilelikdäki bilim we alyş-çalyş taslamalarynyň we maksatnamalarynyň durmuşa geçirilmegi, ekologiýa we ýaşyl öwrülişik pudagyndaky özara gatnaşyklar barada pikir alyşdylar. Şeble-de dürli sebitleýin maksatnamalary durmuşa geçirmek nukdaýnazaryndan netijeli hyzmatdaşlyk bellendi.
ORIENT news
