Türk awiakompaniýasy uçuşlarynda çagasyz zolaklary hödürleýär
Türk awiakompaniýasy Corendon Airlines Ýewropada ilkinji bolup uçuşlarynda ýörite çagasyz zolaklary girizdi. Indi asuda we rahat uçmak isleýän ýolagçylar goşmaça töleg edip we diňe ulularyň oturmagyna rugsat berlen ýerleri alyp bilerler. Bu barada howa gatnawçysynyň metbugat gullugy habar berdi.
Uçar kabinasynyň öň tarapynda, beýleki ýerlerden gaty bölme we perdeler bilen aýrylan aýratyn zolak bölüner. Bu zolakda16 ýaşa çenli ýolagçylaryň bolmagyna rugsat berilmeýär. Corendon Airlines-iň esaslandyryjysy Atilaý Uslu çagasyz zonanyň «uçuş wagtynda goşmaça rahatlyk gözleýän syýahatçylaryň isleglerini kanagatlandyrmak üçin» döredilendigini aýtdy.
Çagasyz eksklýuziw zolakda bary-ýogy 93 ýer bolanlygy sebäpli mümkin boldugyça ir bron edilmegi möhümdir. Corendon Airlines howa gatnawlarynda bu hyzmaty hödürleýän ýeke-täk awiakompaniýa däl. Ondan öň şuňa meňzeş çagasyz zolaklary AirAsia X we Scoot tarapyndan işe girizilipdi.
Corendon Airlines – Antalýada ýerleşýän türk awiakompaniýasydyr. Onuň ygtyýarynda 2004-nji ýyldan bäri yzygiderli we çarter uçuşlaryny amala aşyrýan 32 uçar bar.
ORIENT news
