Ýaýdan ok atmak boýunça Türkmenistanyň Kubogy ugrunda ýaryş geçiriler
Aşgabat şäherindäki Gyşky sport oýunlary toplumynda ýaýdan ok atmak boýunça Türkmenistanyň Kubogy ugrunda ýaryş geçiriler. Ony Ýaýdan ok atmak boýunça milli federasiýasy Bedenterbiýe we sport baradaky döwlet komiteniň ýardamy bilen guraýar.
Türgenler Olimpiýa oýunlarynyň düzgünlerine laýyklykda we ýaş derejelerinde bäsleşerler. Adaty ýaýdan 70 metr, blokly ýaýdan 18 metr aralykdan üsti açyk we ýapyk ýerlerde atyljak ýaý oklary ýurdumyzyň iň ökde türgenlerini ýüze çykarar diýip, “Нейтральный Туркменистан” gazeti habar berýär.
Türgenler toparlarda çykyş edip, iň köp utuk toplanlar ýaryşyň ýeňijileri diýlip kesgitlener. Ýaýdan ok atmak boýunça milli federasiýasynyň ýolbaşçysy Wepa Sähedowyň bellemegine görä, sport ýaryşynyň maksady iň ezber ýaş türgenleri ýüze çykarmakdan we bu sport görnüşini ýaşlaryň arasynda wagyz etmekden ybaratdyr.
ORIENT news
