Türkmenistanyň Döwlet haryt-çig mal biržasynyň işi kämilleşdiriler
Ministrler Kabinetiniň 25-nji awgustda şu ýylyň 7 aýynda ýerine ýetirilen işleriň jemlerine bagyşlanyp geçirilen mejlisinde Prezident Serdar Berdimuhamedow Döwlet haryt-çig mal biržasynyň işiniň kämilleşdirilmegine ünsi çekdi.
Bellenişi ýaly, Döwlet haryt-çig mal biržasynyň işine sanly ulgamy ornaşdyrmak boýunça işleri çaltlandyrmak, eksport we import şertnamalaryny biržada bellige almagyň tertibi, baha emele getirmegiň usulyny kämilleşdirmek möhümdir. Hökümet mejlisinde Prezident Serdar Berdimuhamedow wise-premýer Batyr Atdaýewe şu boýunça degişli tabşyryklary berdi.
Döwlet haryt-çig mal biržasy boýunça ýylyň başyndan bäri birža söwdalarynyň 172-si geçirilip, 18 müň 85 şertnama hasaba alyndy. Söwda-senagat edarasynda sergileriň 11-si we maslahatlaryň 43-si geçirildi.
Senagatçylar we telekeçiler birleşmesi boýunça oba hojalyk we azyk önümlerini öndürmegiň ösüş depgini 106,1 göterime hem-de senagat önümleriniň ösüş depgini 110,8 göterime deň boldy.
ORIENT news
