Özbegistanyň daşary işler ministri Türkmenistanyň täze ilçisini kabul etdi
Türkmenistanyň Özbegistandaky täze bellenen ilçisi Şadurdy Meredow Özbegistanyň daşary işler ministri Bahtiýor Saidow bilen duşuşdy. Bu barada özbek ministriniň telegam kanalynda habar berilýär.
Mälim edilişine görä, türkmen ilçisi Özbegistanyň Daşary syýasat edarasynyň ýolbaşçysy bilen ikitaraplaýyn hyzmatdaşlygyň häzirki ýagdaýyny we geljekki mümkinçiliklerini ara alyp maslahatlaşdy. Duşuşygyň barşynda ilçi ynanç hatlarynyň nusgalaryny goňşy döwletiň daşary işler ministrini gowşurdy.
Şadurdy Meredow Türkmenistanyň Prezidenti Serdar Berdimuhamedow tarapyndan şu ýylyň iýul aýynyň ahyrynda ýurdumyzyň Özbegistandaky ilçisi wezipesine bellendi. Mundan ozal, ol ýurdumyzyň Gyrgyz Respublikasyndaky diplomatik wekilhanasyna ýolbaşçylyk edýärdi.
ORIENT news
