Türkmen-gazak serhedindäki gümrük nokady döwrebaplaşdyrylar
Balkan welaýatynda Türkmenistanyň Döwlet gümrük gullugynyň “Garabogaz” gümrük nokadynyň durky täzelener. Bu boýunça degişli bäsleşigiň bildirişi resmi metbugatda çap edildi.
Şeýle hem, gümrük nokadynyň durkuny täzelemek işleri bilen birlikde, awtoulag serişdelerini barlaýan rentgen barlag enjamyny satyn almak we ony gurnamak bilen bagly gurluşyk işleri ýerine ýetiriler.
Gurluşyk işine gatnaşmaga gyzyklanma bildirýän taraplaryň haýyşnamalary, teklipleri 9-njy oktýabra çenli Aşgabat şäheriniň Arçabil şaýolunyň 84-nji jaýynda ýerleşýän Türkmenistanyň Gurluşyk we binagärlik ministrliginde kabul edilýär.
Türkmenistanyň we Gazagystanyň serhetýakasyndaky gümrük nokatda pyýada geçelge ýolunyň, dynç alyş üçin ýerleri guruljakdygy, elektron nobat ulgamynyň ornaşdyryljakdygy ozal habar berlipdi. 2024-nji ýyla çenli degişli serhet gözegçilik-geçiriş nokadynyň geçirijilik ukybyny 8 – 12 esse artdyrmak üçin degişli çäreler görler.
ORIENT news
