Türkmenistanyň ýokary okuw mekdepleri okuwa kabul ediş möwsümini tamamlaýarlar
Şu gün – 23-nji awgustda Türkmenistanyň ýokary okuw mekdepleriniň aglabasy okuwa kabul ediş möwsümini tamamlaýarlar. Bu möwsüm 17-nji iýulda badalga alypdy.
Ýokary okuw mekdeplerinden tapawutlylykda, orta-hünär okuw mekdeplerine giriş möwsümi ýene 5 gün dowam edip, 28-nji awgustda tamamlanar.
Häzirki wagtda Magtymguly adyndaky Türkmen döwlet uniwersitetinde, M.Garryýew adyndaky Türkmenistanyň Döwlet lukmançylyk uniwersitetinde, Döwletmämmet Azady adyndaky Türkmen milli dünýä dilleri institutynda, Türkmenistanyň Telekommunikasiýalar we informatika institutynda “Türkmenistanyň taryhy” dersinden jemleýji synaglar dowam edýär.
Okuwa kabul ediş möwsümi adatça iki tapgyrda geçirilýär. 17 – 30-njy iýul aralygynda okuwa girmäge isleg bildiren dalaşgärleriň resminamalary kabul edilen bolsa, 2 – 28-nji awgust aralygynda giriş synaglary tabşyrmak döwri dowam edýär. Şu gezekki synaglaryň tapawutly aýratynlygy olaryň ýokary ýa-da orta-hünär okuw mekdebiniň öz binasynda geçirilmegidir. Şeýle görnüşdäki synaglar mundan ozal, iň soňky gezek 2019-njy ýylda geçirilipdi.
ORIENT news
