Güýz sowuk howa geçmäge howlukmaýar: Türkmenistanda howanyň temperaturasy +32° çenli ýokarlanar
Hepdäniň ahyryna çenli Türkmenistanda, esasan, gurak we maýyl howa saklanar. Gündizlerine käbir ýerlerde howanyň temperaturasy +31…+32° çenli ýokarlanar, gijelerine bolsa salkyn düşer. Dynç günleri Balkan welaýatynyň käbir ýerlerinde az-kem ýagyş ýagmagy mümkin.
Howa maglumatlaryny taýýarlaýan hünärmenleriň habar bermegine görä, ýurduň howa şertlerine merkezi Gazagystanyň demirgazyk-gündogarynda ýerleşýän giň antisiklonyň günorta-günbatar çetiniň täsiri ýetirer. Gündizlerine howanyň iň ýokary temperaturasy Türkmenistanyň günorta-günbatarynda hasaba alnar. Bu ýerde Günbatar Köpetdagyň şahalary demirgazyk-gündogar ýellerinden goraýar.
15-nji oktýabrda gijelerine howanyň temperaturasy, esasan, +8…+13°, Balkan welaýatynyň käbir ýerlerinde bolsa +15…+17° bolar. Gündizlerine Balkan welaýatynda howa +25…+30°-a çenli gyzar. Ýurdun demirgazyk we demirgazyk-gündogar sebitlerinde +20…+25°, beýleki sebitlerde bolsa +23…+28° garaşylýar.
16-njy oktýabrda gijelerine ýurduň demirgazygynda, demirgazyk-gündogarynda we iň günorta böleginde howanyň temperaturasy +7…+12°, beýleki sebitlerde bolsa +12…+17° bolar. Gündizlerine howa +23…+28°-a çenli gyzar, günorta-günbataryň käbir ýerlerinde bolsa +31°-a ýeter. Balkan welaýatynda ýel güýçlenip, onuň tizligi 13–18 m/s-a çenli ýetip biler.
17-nji oktýabrda gijelerine ýurduň demirgazyk we demirgazyk-gündogar sebitlerinde howanyň temperaturasy +5…+10°-a çenli peseler, beýleki sebitlerde +8…+13° bolar. Balkan welaýatynyň käbir ýerlerinde howa has maýyl bolup, temperatura +13…+18°-a ýeter. Gündizlerine ýurduň demirgazyk we demirgazyk-gündogar sebitlerinde +18…+23°, beýleki sebitlerde bolsa +23…+28° garaşylýar. Balkan welaýatynyň käbir ýerlerinde howanyň temperaturasy +27…+32°-a çenli ýokarlanar.
18-nji oktýabrda gijelerine ýurduň demirgazyk we demirgazyk-gündogar sebitlerinde howanyň temperaturasy +4…+9°, beýleki sebitlerde +7…+12° bolar. Balkan welaýatynyň käbir ýerlerinde temperatura +13…+18° derejesinde saklanar. Gündizlerine Daşoguz welaýatynda we Lebap welaýatynyň käbir ýerlerinde howa +17…+22°-a çenli gyzar, beýleki sebitlerde bolsa, esasan, +22…+27° bolar. Balkan welaýatynyň günbatar we günorta-günbatar böleklerinde howanyň temperaturasy ýene-de +27…+32°-a çenli ýokarlanyp biler.
Umuman, ýakyn günlerde ygalyň ýagmagyna garaşylmaýar. Diňe Balkan welaýatynyň käbir ýerlerinde dynç günleri az-kem ýagyş ýagmagy mümkin.
