Güýçli ýagyşlar Stambulda suw joşgunyna sebäp boldy
14-nji oktýabrda Stambulda ýagan güýçli ýagyşlar giň gerimli suw basmalaryna sebäp boldy, ulag hereketini bozdy we ýaşaýyş jaýlaryny hem-de täjirçilik desgalaryny suw basdy. Associated Press halkara habarlar agentliginiň maglumatlaryna görä, ýüze çykan hadysalaryň netijesinde iki adam aradan çykdy.
Stambul şäher häkimliginiň Adatdan daşary ýagdaýlar boýunça utgaşdyryş merkeziniň (AKOM) maglumatlaryna görä, şäheriň käbir etraplarynda ýagynlaryň mukdary rekord derejä ýetdi. Beýkoz etrabynda her inedördül metr meýdana 255,8 kg, Eýýupsultanda 195,9 kg, Saryýerde bolsa 195,6 kg ygalyň düşendigi hasaba alyndy. Käbir etraplarda bu görkezijiler 1985-nji ýyldan bäri hasaba alnan iň ýokary derejeleriň hataryna girdi.
Güýçli ýagyşlar sebäpli ýollary, ýerasty geçelgeleri, jaýlaryň birinji gatlaryny we ýerzeminlerini suw basdy. Käbir awtoulaglar suwuň aşagynda galdy ýa-da suw akymy tarapyndan süýşürildi. Ýaşaýjylar we kärhanalaryň işgärleri suw basan binalardan özbaşdak çykyp bilmediler. Halas ediş gulluklary adamlary ewakuasiýa etdiler. Bu işlerde gaýyklardan we ýörite tehnikalardan hem peýdalanyldy.
Stambul welaýatynyň häkimliginiň maglumatlaryna görä, 14-nji oktýabrda sagat 06:00-dan 20:00-a çenli gyssagly gulluklara dürli hadysalar barada 2 518 habar gelip gowuşdy. Hasaba alnan hadysalaryň arasynda 1 277 suw basma, 15 ýer süýşmesi we adamlaryň howply ýerlerden özbaşdak çykyp bilmän, kömege mätäç bolan 47 ýagdaý bar.
Häkimiýetler 15-nji oktýabrda şäherdäki ähli döwlet we hususy bilim edaralarynda okuwlaryň adaty görnüşde geçirilmeginiň wagtlaýyn togtadylýandygyny yglan etdiler. Şeýle hem motosiklleriň we beýleki iki tigirli ulag serişdeleriniň hereketine wagtlaýyn çäklendirmeler girizildi. Ýaşaýjylara zerurlyk bolmasa öýlerinden çykmazlyk we suw basan köçelerden ulag bilen geçmezlik maslahat berildi.
Associated Press agentliginiň maglumatlaryna görä, aradan çykanlaryň arasynda Fatih etrabynda suw batgalygynda elektrik togunyň urmagy netijesinde aradan çykan 14 ýaşly ýetginjek we Saryýer etrabynda suw basan köçede typyp ýykylyp, kellesini uran 34 ýaşly adam bar.
Şäher häkimliginiň we gyssagly gulluklaryň işgärleri ýaramaz howa şertleriniň netijelerini aradan aýyrmak boýunça işleri dowam etdirýärler. AKOM-yň maglumatlaryna görä, iň güýçli ýagyşlar Bosfor bogazynyň boýundaky etraplarda, şeýle hem şäheriň Ýewropa böleginiň demirgazyk we merkezi sebitlerinde ýagdy.
