Türkmen sazandalary Astrahanda geçiriljek “Hazar möwsümleri – 2023” festiwalynyň açylyşyna gatnaşarlar
Sişenbe güni Astrahanda “Hazar möwsümleri - 2023” «Hazar möwsümleri — 2023» halkara nusgawy sungat festiwalynyň açylyş dabarasy geçiriler. Konsert maksatnamasyna hazarýaka döwletleri - Azerbaýjanyň, Eýranyň, Gazagystanyň, Russiýanyň we Türkmenistanyň tanymal sungat işgärleri gatnaşar.
Festiwal agşam Astrahan Kremliniň Kafedral meýdanynda badalga alar. Bu ýerde multimediýa görnüşindäki uly konsert - Mihail Golikowyň ýolbaşçylygyndaky hazarýaka döwletleriň simfoniki orkestriniň sazandarlyk etmeginde opera sahnasynyň tanymal ussatlary - rus opera aýdymçysy Ildar Abdrazakow, Uly teatryň aýdymçysy, Azerbaýjanyň halk artisti Elçin Azizow, ýaş türkmen ýyldyzy Leýli Ökdirowa, tenor Nurlan Bekmuhambetow, eýranly sazanda Mehdi Hosseýni we beýleki meşhur sungat işgärleri çykyş eder.
Guramaçylar festiwalyň her gününiň täsirlere baý boljakdygyny aýdýarlar. Maksatnama 24-nji awgustda Ýaşlar simfoniki orkestriniň çykyşy bilen dowam eder. Sazandalar Çaýkowskiniň, Rahmaninowyň, Rimskiý-Korsakowyň eserlerini ýerine ýetirerler. Soňra baýramçylyk dabaralary Astrahan filarmoniýasynda dowam eder, ol ýerde 25-nji awgustdan 28-nji awgust aralygynda hazarýaka sebitiň iň gowy ýerine ýetirijileri çykyş ederler.
Şol günler "Azerbaýjanyň güni", "Eýranyň güni", "Gazagystanyň güni" we 28-nji awgustda "Türkmenistanyň güni" geçiriler. Konsertde ýurdumyza Türkmenistanyň halk artisti Atageldi Garyagdyýew, Türkmenistanyň at gazanan artisti, pianinoçy Wladimir Mkrtumow we Bahram Dolyýewiň çeper ýolbaşçylygyndaky "Kamerata Aşgabat" döredijilik topary wekilçilik eder.
Açyk howada geçiriljek konsertler festiwalyň esasy wakasyna we bezegine öwrüler - Mihail Glinkanyň "Iwan Susanin" operasy Astrahan Kremline ýanaşyk meýdançada geçiriler. Astrahanyň opera we balet teatrynyň uly sahnasynda bolsa Russiýanyň halk artisti Denis Masuýewiň we dürli nesilleriň artistleriniň gatnaşmagynda “Denis Masuýew hödürleýär: nesilleriň dialogy” atly aýdym-saz konserti bolar.
2023-nji ýylyň “Hazar möwsümleri” fwstiwaly 6-njy sentýabrda balet baýramçylygy bilen tamamlanar. Festiwalyň guramaçylarynyň saýtynda berilýän habara görä, Uly teatryň prima-balerinasy Swetlana Zaharowa Astrahan opera we balet teatrynyň sahnasynda çykyş eder.
ORIENT news
