Türkmen ilçisi Gazagystanyň ýokary okuw mekdebinde talyplaryň öňünde çykyş etmäge çagyryldy
Türkmenistanyň Gazagystandaky Adatdan daşary we Doly ygtyýarly ilçisi Batyr Rejepow Gazagystanyň M.S.Narykbaýew adyndaky ynsanperwer, hukuk uniwersitetiniň dolandyryş ýolbaşçysy Talgat Narikbaýew bilen duşuşdy. Bu barada Türkmenistanyň Gazagystandaky ilçihanasy habar berýär.
Duşuşygyň barşynda Talgat Narikbaýew türkmen ilçisini ýokary okuw mekdebiniň professor-mugallymlarynyň we talyp ýaşlarynyň öňünde çykyş etmäge çagyrdy. Şeýle hem, Gazagystanyň Hökümeti tarapyndan ýurduň bilim ulgamyny kämilleşdirmek boýunça alnyp barylýan işler bilen ilçi tanyşdyryldy.
Öz gezeginde, türkmen ilçisi Türkmenistanda bilim ulgamyny döwrebaplaşdyrmakda durmuşa geçiirlýän giň gerimli işler, halkara reýtinge girýän ýokary okuw mekdeplerinde bilim alan ýaşlaryň diplomlarynyň tassyklanmagy babatda geçiirlýän çäreler barada ýokary okuw mekdebiniň ýolbaşçysyna gürrüň berdi.
Şeýle hem, ilçi ýokary okuw mekdebiniň ýolbaşçysyny Aşgabatda 10 - 12-nji oktýabrda geçiriljek Bilim, saglygy goraýyş we sport ulgamlary boýunça halkara foruma gatnaşmaga çagyrdy.
Duşuşygyň ahyrynda türkmen diplomaty Türkmenistanyň Halk Maslahatynyň Başlygy Gurbanguly Berdimuhamedowyň "Türkmenistanyň dermanlyk ösümlikler" atly ylmy eserini ýokary okuw mekdebiniň kitaphanasyna sowgat etdi.
ORIENT news
