Türkmenistanyň Prezidenti Budapeştdäki ýeňil atletika boýunça dünýä çempionatynyň hormatly myhmany boldy
Türkmenistanyň Prezidenti Serdar Berdimuhamedow 20-nji awgustda, ýekşenbe güni Wengriýanyň paýtagtyndaky Milli ýeňil atletika merkezine baryp, ýeňil atletika boýunça dünýä çempionatynyň iň köp garaşylýan ýaryşy bolan erkekleriň arasynda 100 metr aralyga geçirilen soňky jemleýji tapgyra tomaşa etdi.
Ozal habar berlişi ýaly, Türkmenistanyň Döwlet Baştutany premýer-ministr Wiktor Orbanyň çakylygy bilen Wengriýa döwletiniň esaslandyrylan gününe we ýeňil atletika boýunça dünýä çempionatyna gabat gelýän iş sapary bilen Budapeşte bardy.
Ýaryşlara şeýle-de,Türkiýäniň Prezidenti Rejep Taýyp Ärdogan, Serbiýanyň Prezidenti Aleksandr Wuçiç, Özbegistanyň Prezidenti Şawkat Mirziýoýew, Gyrgyzystanyň Prezidenti Sadyr Žaparow, Kataryň emiri Şeýh Tamim bin Hamad Al Tani, Russiýa Federasiýasynyň Tatarstan Respublikasynyň raisi Rustam Minnihanow Bosniýa we Gersegowinanyň prezidiumynyň agzasy Želka Swiýanowiç hem tomaşa etdi.
Çäräniň çäginde, hormatly myhmanlar biri-biri bilen gürleşmäge we hyzmatdaşlygyň möhüm meseleleri barada pikir alyşmaga mümkinçilik aldylar.
MTI tarapyndan çap edilen suratlara görä, Wengriýanyň paýtagtyndaky Milli ýeňil atletika merkezinde Çehiýanyň ozalky premýer-ministri Andreý Babiş, Awstriýanyň ozalky kansleri Sebastýan Kurs we başga-da birnäçe görnükli syýasatçylar bardy.
Soňra Prezident Serdar Berdimuhamedow Wengriýanyň premýer-ministriniň rezidensiýasyna tarap ugrady, ol ýerde Wengriýanyň milli baýramy mynasybetli dabaraly kabul edişlik geçirildi.
Iş sapary tamamlanandan soň, Türkmenistanyň Prezidenti Budapeştden watanyna ugrady.
ORIENT news
