Türkmen gimnastikaçylary Daşkentde geçiriljek halkara ýaryşa gatnaşarlar
Türkmen gimnastikaçylary Özbegistanda geçiriljek halkara ýaryşa gatnaşmaga taýýarlanýar. Olar 26-njy awgustdan 28-nji awgust aralygynda Daşkentde geçiriljek EAST CUP & OLYMPIC STARS ýaryşynda dürli ýurtlaryň iň oňat türgenleri bilen bäsleşer.
Türkmenistanyň milli ýygyndysyna 2008-nji ýyldan 2016-njy ýyla çenli dürli ýaşdaky 20 gyz girýär, olar Aşgabat, Mary we Balkan welaýatlaryna wekilçilik edýärler.
Ýaş gimnastikaçylar Gruziýada geçirilen ýaryşda üstünlikli çykyş edip, 6 baýrak (1 altyn, 4 kümüş, 1 bürünç) gazandylar, öňümizdäki ýaryşlarda türgen gyzlar täze işlenip düzülen çylşyrymly çykyşlaryny görkezerler.
Türkmenistanyň çeper gimnastika boýunça milli ýygyndy toparynyň baş tälimçisi Fiza Aýwazowa ORIENT-e özleriniň täze üstünlikleri görkezmek we täsirli çykyşlaryny dowam etdirmek isleýändiklerini aýtdy.
Türkmen toparynyň düzümine Iliana Tokarewa, Narmina Abasowa, Sofiýa Bens, Hatýja Akmyradowa, Mahym Gurbanowa, Amelia Bens, Leýli Batyrowa, Fatima Kambarowa, Aýlin Günaslan, Sara Kulberdyýewa, Aýsen Abdullaýewa, Mähri Pomanowa, Mähri Orazowa, Inara Hanowa, Weronika Kurdunowa, Leýli Imankulyýewa, Firdews Günaslan, Gülşat Berkeliýewa, Mähri Berdiýewa, Karolina Kim dagylar girýär.
Olaryň arasynda ýaňy ýedi ýaşyna ýeten gyzlaryň bardygyny bellemelidiris. Türkmenistanyň gimnastika boýunça milli ýygyndy toparynyň baş tälimçisi tejribe toplamak we geljekde ösüş üçin itergi bermek üçin olary milli ýygyndy toparyna goşmak kararyna gelendigini düşündirdi.
Fiza Aýwazowa ähli gyzlaryň uly mümkinçilikleriniň we zehininiň bardygyny hem belläp geçdi. Çeper gimnastikanyň diňe bir sport däl, eýsem sungatdygyny hem-de öz şägirtleriniň çykyşlary arkaly içki duýgularyny we häsiýetlerini beýan etmegini isleýändigini aýtdy.
Şeýle hem, ýaryşa gatnaşyjylar üçin başarnyklaryny ýokarlandyrmak maksady bilen Russiýanyň meşhur gimnastikaçylarynyň ussatlyk sapaklaryny geçirmek göz öňünde tutulýar.
“EAST CUP & OLYMPIC STARS” ýaryşlaryna Türkmenistandan, Ysraýyldan, Gazagystandan, Gyrgyzystandan, BAE-den, Russiýadan, Singapurdan, Ukrainadan we Özbegistandan üç ýüzden gowrak gimnastikaçy gatnaşar.
ORIENT news
