Türkmen agyr atletikaçylary Dubaýda geçiriljek dünýä çempionatynda çykyş eder
22-31-nji awgustda Dubaýda (BAE) geçiriljek dünýä çempionatyna agyr atletikanyň pauerlifting görnüşi boýunça türkmen türgenleri gatnaşar. Bu barada ORIENT-e ýurdumyzyň Bedenterbiýe we sport baradaky döwlet komitetinde habar berildi.
Ýakynda geçiriljek dünýä çempionatyna türkmen wekiliýetiniň düzüminde 13 türgen, şol sanda paralimpiýa pauerliftçileri: Mekan Agalykow, Maýa Japarowa, Maýagözel Ekäýewa, Roza Matýakubowa, Sergeý Meladze, Laçyn Baýramowa, Baýramgeldi Saparow, Işkuwwat Çaryýew, Döwletgeldi Amanmyradow we Öwezgeldi Örjiýew dagylar gatnaşar.
Ýaryşda iň garaşylýan türgenler - 2008-nji ýylyň tomusky paralimpiýa oýunlarynyň çempiony müsürli Osman Şerif, 2020-nji ýylda Tokioda geçirilen tomusky paralimpiýa oýunlarynyň çempiony iordaniýaly Omar Karada we 2022-nji ýylda geçirilen dünýä çempionatynda üç gezek dünýä rekordyny täzelän Abdelkarim Hatab.
Para pauerlifting daýanç-hereket ulgamynyň bozulmalary bolan şahslar üçin paralimpiýa sport görnüşidir. Maşky ýerine ýetirýän wagtynda türgen bedeniň ýokarky böleginiň güýjüni görkezýär.
Para pauerlifting boýunça dünýä çempionaty Parižde geçiriljek 2024-nji ýyldaky tomusky paralimpiýa oýunlaryna saýlama utuklar üçin bäsleşjek 79 ýurtdan alty ýüzden gowrak gatnaşyjyny birleşdirer.
ORIENT news
