Türkmen telekeçisi organiki dökünleriň önümçiligini ýola goýdy
Türkmen telekeçisi Arslan Garajaýew daýhanlara we ekerançylara “Nourivit Plus” tehnologiýasy boýunça öndürilen organiki dökünleri hödürleýär. Ol Ahal welaýatynda ýerleşýän kärhanada topraga suwuk görnüşdäki organiki goşundylary öndürip başlady. Mikroorganizm medeniýeti bilen utgaşyklykda Nourivit Plus tebigy mineral goşundysy topragyň ýaramaz şertlerinde-de ekin hasylyny ep-esli ýokarlandyrýar.
Zawod Awstriýanyň enjamlary bilen enjamlaşdyrylandyr we ýylda 240 tonna önüm öndürmäge mümkinçilik berýär. Ony dürli görnüşli däneli, pagta, gök-bakja ekinlerinde, bagbançylykda we beýleki ösümlikleri ýetişdirmekde ulanmak bolýar.
Şeýle hem daýhanlar ýurdumyzyň toprak we howa şertlerinde oba hojalyk ekinleriniň we baglaryň kesellerine we zyýan berijilerine garşy Nourivit Plus döküninden üstünlikli peýdalanýarlar. Türkmenistanyň Senagatçylar we telekeçiler birleşiginiň saýtynda berilýän habara görä, bilermenler eýýäm bu erginiň oba hojalygynda we bagbançylykda ulanylmagynyň möwsümleýin usullaryny we düzgünlerini işläp düzdüler.
ORIENT news
