Ýaponiýanyň Sukuba uniwersiteti türkmen dilini öwrenmek boýunça kurslary ýola goýýar
Türkmenistanyň ÝOM-leri bilen işjeň hyzmatdaşlyk saklaýan Ýaponiýanyň öňdebaryjy uniwersitetleriniň biri Sukuba uniwersiteti 2023-nji ýylyň sentýabr aýynda ýapon we daşary ýurtly talyplar üçin türkmen dili kurslaryny açýar.
Türkmen dilini öwrenmek, Türkmenistanyň medeniýeti bilen tanyşmak boýunça sapaklar Masahiro Oku tarapyndan geçiriler.
Masahiro Oku D.Azady adyndaky Türkmen milli dünýä dilleri institutynyň ýapon dili bölüminiň uçurymy Jennet Rozykulyýewa bilen bilelikde taýýarlanan ýapon- türkmen sözlüginiň awtory. Okuw gollanmasy Ýaponiýada türkmen dilini tanatmak taslamasynyň çäginde 2023-nji ýylyň iýul aýynda neşir edildi.
Şeýle hem, “Nippon” gaznasynyň Merkezi Aziýada we Ýaponiýada adam resurslaryny ösdürmek taslamasynyň çäginde Sukuba uniwersitetiniň professory Toşinobu Usuýama we Masahiro Oku TMDDI-niň ýapon dili hünäri boýunça bilim alýan talyplary üçin dürli mowzuklar, şol sanda ýapon we türkmen dilleriniň deňeşdirme seljermesi boýunça leksiýalary okadylar – diýlip, Türkmenistanyň DIM-niň metbugat beýanatynda habar berilýär.
ORIENT news
