Şawkat Mirziýoýew Türkmenistanyň, Täjigistanyň we Özbegistanyň Baştutanlarynyň sammitine ýokary baha berdi
Türkmen halkynyň Milli Lideri Gurbanguly Berdimuhamedowyň başlangyjy bilen geçirilen Türkmenistanyň, Täjigistanyň we Özbegistanyň Baştutanlarynyň sammiti sebitde döwletara hyzmatdaşlygynyň ösdürilmegine täze itergi berer.
Bu barada Özbegistanyň Prezidenti Şawkat Mirziýoýew Aşgabatda geçirilen üçtaraplaýyn sammitiň üstünlikli guralmagy mynasybetli Türkmenistanyň Halk Maslahatynyň Başlygy Gurbanguly Berdmuhamedowa iberen hatynda belledi.
Sammitiň jemleri boýunça Bilelikdäki Beýannama Türkmenistanyň, Täjigistanyň hem-de Özbegistanyň mundan beýläk-de ýakynlaşmagynyň ýolundaky möhüm taryhy waka boldy, diýip Mirziýoýew aýtdy.
Şeýle hem Özbegistanyň Baştutany üç döwletiň bilermenleriniň, hünärmenleriniň gazanylan ylalaşyklary iş ýüzünde doly durmuşa geçirmek boýunça anyk çäreleri işläp taýýarlamaga girişendiklerini aýratyn belledi.
Şunuň bilen bir hatarda Mirziýoýew, Aşgabatda geçirilen duşuşykda sebitiň suw serişdelerini bilelikde we netijeli ulanmak, energetika ulgamynda umumy geljegi kesgitlemek, üstaşyr ulag kuwwatyny giňeltmek boýunça pikir alyşmalaryň bolandygyny aýtdy.
ORIENT news
