Aşgabatda geçirilen sammitde suw serişdeleri we howa pudagynyň utgaşdyrylmagy göz öňünde tutuldy
Türkmenistanyň, Täjigistanyň we Özbegistanyň Prezidentleri şu gün, 4-nji awgustda Aşgabatda geçirilen üçtaraplaýyn sammitiň giňişleýin gün tertibiniň çäginde suw serişdeleri we howa pudagyndaky hyzmatdaşlygy ara alyp maslahatlaşdylar.
Duşuşykdan soň neşir edilen döwlet Baştutanlarynyň beýanyndan görnüşi ýaly, taraplar suw serişdelerini netijeli dolandyrmak, goramak we tygşytly peýdalanmak, suw serişdelerini tygşytlamak we gaýtadan ulanmak, şol sanda bar bolan ygtyýarly sebit edaralarynyň mümkinçiliklerini ulanmak ýaly ugurlarda mundan beýläkki bilelikdäki gözlegleri we ösüşleri geçirmek barada ylalaşdylar.
Prezidentler Amyderýa derýasynyň basseýninde suw we energetika meselelerini çözmek üçin bar bolan we gurulýan gidroelektrik desgalarynyň ähmiýetini belläp, suw we energetika çeşmelerini toplumlaýyn we oýlanyşykly peýdalanmak boýunça ýurtlaryň arasynda özara peýdaly hyzmatdaşlygy güýçlendirmäge çagyrdylar.
Şeýle hem, döwlet Baştutanlary suw we energetika meseleleri boýunça konstruktiw gepleşikleri dowam etdirmegiň möhümdigini göz öňünde tutup, Amyderýanyň suw serişdelerinden tygşytly peýdalanmagyň möhümdigini nygtadylar.
Sammitiň dowamynda howanyň üýtgemegi we Amyderýanyň suw serişdeleri edilýän basyşyň ýokarlanmagy bilen baglanyşykly täze kynçylyklara netijeli jogap bermegi üpjün etmek üçin özara täsir mehanizmlerini kämilleşdirmek zerurlygy bellendi.
Mundan başga-da, Merkezi Aziýanyň üç döwletiniň ýolbaşçylary howanyň üýtgemeginiň netijelerini ýumşatmak we oňa uýgunlaşmak, çölleşmek, ýerleriň zaýalanmagy, buzluklaryň eremegine garşy göreşmek, daşky gurşawy goramak, irki duýduryş ulgamlary, ekologiýa, biodürlüligi goramak, umumy taslamalary öňe sürmek boýunça hyzmatdaşlygy has-da güýçlendirmegiň, şeýle hem sebitleýin we halkara platformalaryň we hyzmatdaşlygyň mehanizmleriniň çäginde umumy gyzyklanmalara laýyk gelýän bilelikdäki başlangyçlary öňe sürmegiň möhümdigini bellediler.
ORIENT news
