Parižde 100 ýyllyk arakesmeden soň Sena derýasynda suwa düşmäge rugsat berler
Parižiň şäher häkimiýeti 100 ýyllyk arakesmeden soň Senada suwa düşmäge rugsat bermegi göz öňünde tutýar. Fransuz paýtagtynyň meri Ann Idalgo 2025-nji ýylda şäherde Senada suwa düşmek üçin üç zolagyň açyljakdygyny tassyklady. Derýada arassalaýyş işleri tamamlanandan soň, şäher derýasynda ýüzüş 2024-nji ýylyň Olimpiýa oýunlarynyň esasy üstünliklerinden biri bolar. “Le Parisien” gazetiniň berýän habaryna görä, Oýunlaryň maksatnamasyna laýyklykda, paýtagt derýasynda olimpiýa we paralimpiýa ýaryşlarynyň üçüsini - triatlon, marafon ýüzüşi we paratriatlon geçirmek meýilleşdirilýär.
Olimpiýa oýunlaryndan soň derýanyň kenarýakasynda açyk howada ýüzmek üçin üç sany zolak elýeter bolar. Şäher merkezindäki Sen-Lui adasynyň garşysyndaky, günbatardaky 15-nji okrugda Grenelle kenarýakasyndaky we gündogarda ýerleşen 12- nji okrugda Bersidäki meýdançalar ýörite buýlar bilen bellik ediler we halas edijiler tarapyndan gözegçilik ediler. Suwa düşülýän ýerlere pontonlar hem getiriler we suwa düşýänleriň eşik çalyşmagy, goşlaryny goýmagy üçin ýörite şertler dörediler - diýlip häkimligiň beýanatynda bellenilýär.
Fransiýanyň paýtagtyndaky esasy derýanyň suw arassalaýyş taslamasyna 1,4 milliard ýewro bölünip berildi, şeýle-de bu ýerde çuňlugy 34 metr we ini 50 metr bolan ullakan suw howdanyny gurmak meýilleşdirilýär, ol göwrümi boýunça Olimpiýa howuzlarynyň 20-sine deňdir.
Senada suwa düşmäge gadaganlyk 1923-nji ýylda baržalar we gezelenç gämileri bilen baglanyşykly howp, şeýle hem suwuň hiliniň çalt ýaramazlaşmagy sebäpli girizildi. Şol bir wagtyň özünde, derýany ýüzüp geçmek boýunça roždestwo bäsleşikleri Ikinji jahan urşuna çenli dowam edipdi.
ORIENT news
