Bakuwda türkmen-azerbaýjan deňiz ýük daşamalaryny giňeltmegi ara alyp maslahatlaşdylar
Duşenbe güni Bakuwda Merkezi Aziýa bilen Ýewropanyň arasynda ýük gatnawynyň mukdarynyň artmagy, şeýle hem Türkmenistan bilen Azerbaýjanyň arasynda deňiz daşamalary pudagynda özara peýdaly hyzmatdaşlygy giňeltmek mümkinçiligi ara alnyp maslahatlaşyldy. Azerbaýjanyň paýtagtyna iş sapary bilen gelen türkmen wekiliýetine Türkmenistanyň Söwda we daşary ykdysady aragatnaşyklar ministrliginiň müdiri Myrat Myradow ýolbaşçylyk edýär.
Azerbaýjan metbugatynyň habaryna görä, taraplar Bakuw halkara deňiz söwda portunyň çäginde gepleşikler geçirdi. Bu ýere gelenler döwrebap duralganyň tehniki mümkinçilikleri, häzirki we meýilleşdirilen infrastruktura taslamalary bilen tanyşdylar. Myhmanlara Azerbaýjanyň ulag işgärleriniň hyzmatdaşlyk edýän dünýäniň öňdebaryjy portlary, Azerbaýjanyň suw «derwezelerinden» daşalýan ýükleriň mukdary we özara hyzmatdaşlyga gyzyklanýan logistika korporasiýalary barada maglumat berildi.
Türkmen wekiliýetiniň duşuşygy wagtynda Gollandiýanyň Royal HaskoningDHV kompaniýasy tarapyndan işlenip düzülen Baku deňiz portunyň ikinji bölegini gurmak taslamasy hödürlendi. Meýilnamanyň ýylyň ortalaryna taýýar bolmagyna garaşylýar.
Häzirki wagtda Baku deňiz portunyň önümçiligi ýylda 15 million tonna. Hünärmenleriň pikrine görä, Gollandiýa taslamasynyň durmuşa geçirilmegi portdan geçýän ýük gatnawynyň mukdaryny 25 million tonna çenli artdyrar. Bu maksatlar üçin eýýäm serişde bölünip berildi diýip, habarda aýdylýar.
ORIENT news
