Türkmen alymlary oba hojalygyny netijeli ösdürmek boýunça teklipleri öňe sürýärler
Türkmenistanyň Ylymlar akademiýasynyň Tehnologiýalar merkeziniň alymlary Meretmuhammet Hudaýberdiýew we Nasiba Çarykulyýewa damjalaýyn suwaryşyň innowasion enjamy öňe sürýärler. Bu enjam oba hojalyk ekinlerini suw bilen üpjün etmek bilen birlikde, olary zyýanly mör-möjeklerden goraýan we peýdaly mikroorganizmleriň ösüşine ýardam edýän serişdeler bilen hem üpjün edýär.
Gyzykly ýeri, bu enjam türkmen alymlary tarapyndan senagat galyndylaryndan taýýarlanyldy. Enjamyň kömegi arkaly peýdaly mikroelementler suw arkaly ösümligiň köküne barar ýaly edilýär. Bu mikroelementler ösümligiň köküne zyýan ýetirmez ýaly edilip ýetirilýär. Bitewi suwaryş ulgamyndan iýmitlendiriş elementleri alýan enjam bu mikroelementlerden ösümligiň dürli ýerindäki we iň düýpdäki köki arkaly iýmitlenip bilmegine şert döredýär.
Alymlar oba hojalygyny netijeli ösdürmek üçin ýene-de bir täze ylmy usuly öňe sürýärler. Bu usul energiýanyň alternatiw usulyny kombinirlemek arkaly tebigy serişdeleri netijeli ulanmakdan ybaratdyr. Bu usul ilki bilen, kalsinirlenen suwotulary, termomineral suwlaryň mikroelementlerini, gidrooksid kalsiýni, seoliti we beýleki goşundylary goşmak arkaly ekologiýa taýdan arassa iýmitlendirijileri öndürmek bilen baglanyşyklydyr.
Kombinirlenen bu goşundynyň ekerançylyk ýerlerinde peýdalanylmagy şorlaşan ýerleriň gaýtadan dikeldilmegine we ýeri peýdaly mikroelementler bilen baýlaşdyrmaga ýardam eder. Ony ösümlikleriň ýüzüne hem sepmek bolar.
ORIENT news
