AirPods gulaklyklarda gradusnik peýda bolar
Apple kompaniýasy AirPods simsiz gulaklyklaryň täze wersiýasyna täze funksiýalary ornaşdyrmagy meýilleşdirýär. Şeýlelikde, AirPods-a gulak nowajygynyň üsti bilen bedeniň gyzgynlygyny ölçemegi öwrederler, olar USB-C portyndan zarýad alar.
«Kompaniýa sagdyn eşidişi goldamak we bedeniň gyzgynlygyny kesgitlemek üçin täze funksiýalaryň girizilmeginiň görnüşlerini öwrenýär, şeýle hem has arzan modelleriň çykarylmagyny we USB-C zarýad portlaryna geçilmegini meýilleşdirýär» — diýip, Bloomberg habar berýär.
Gyzgyny ölçemegiň şuňa meňzeş usuly Apple akylly sagatlaryndaky ýaly bilekdäki ölçeg bilen deňeşdireniňde has anyk netijeleri berer.
Mundan başga-da, çeşmäniň habar bermegine görä, Apple-den simsiz gulaklyklaryň täze wersiýasy eşidişinde bozulma bolan adamlara peýdaly bolar. Mysal üçin, ýörite goşundynyň kömegi bilen gurluş eşidiş bilen bagly bolan meseleleri ýüze çykaryp biler. Aksessuar şeýle hem eşidiş apparatynyň ýerini tutar.
ORIENT habarlar
