Orban: Türkmenistan Ýewropadaky energetika üpjünçiliginiň diwersifikasiýasyna möhüm goşant goşup biler
Türkmenistan bilen Wengriýanyň arasyndaky gatnaşyklary öňünden aýdyp boljak, ygtybarly we özara hormata esaslanan diýip, premýer-ministr Wiktor Orban anna güni Prezidentimiz Serdar Berdimuhamedow bilen geçirilen gepleşikleriň netijesine görä metbugat üçin eden çykyşynda belledi.
– Biz bu ýere gowy niýet we iki ýurduň arasyndaky hyzmatdaşlygy giňeltmek hem-de çuňlaşdyrmak meýilnamasy bilen geldik,-diýip Orban aýtdy we saparynyň halkara syýasatynda kyn ýagdaýyň fonunda geçýändigini, türkmenistanyň bolsa edil Wengriýa ýaly parahatçylyk we diplomatiýa üçin çykyş edýändigini nygtady.
– Häzirki ýagdaý tutuş Merkezi Aziýa sebitiniň gymmatyny ýokarlandyrýar we bu sebitiň Gündogar bilen Günbataryň arasynda köpri bolmak ähtimallygy ýokary, - diýip ol belläp, bize Merkezi Aziýadan energiýanyň Ýewropa gelmegi gerek we munuň üçin täze çeşmeler, täze ugurlar, täze infrastruktura gerek diýip, sözüniň üstüni ýetirdi. Türkmenistan bu meselede Ýewropa we Wengriýa üçin ajaýyp hyzmatdaş bolup biler.
Orbanyň pikrine görä, Türkmenistan Ýewropada energetika üpjünçiliginiň diwersifikasiýasyna möhüm goşant goşup biler, emma öňünden çylşyrymly infrastruktura we ulag meseleleri çözülmeli.
Onuň sözlerine görä, Wengriýa Türkmenistana derman serişdeleriniň üpjünçiliginde ep-esli paýa eýe bolup, gepleşiklerden soň suw pudagynda hyzmatdaşlyga mümkinçilik dörediler, şeýle hem energetika pudagyndaky hyzmatdaşlykdan başga-da iki tarap hem hyzmatdaşlygyň täze ykdysady ugurlaryna goldaw berer.
– Biz wenger dilini Türkmenistanda öwretmegi meýilleşdirýäris we taryhy gatnaşyklara laýyk güýç we çuňluk bilen iki ýurduň arasynda syýasy we ykdysady gatnaşyklaryň ýola goýulmagyny isleýäris - diýip, Wiktor Orban sözüni jemledi.
ORIENT news
