Pakistan we Türkmenistan TAPI-niň çalt durmuşa geçirilmegi üçin bilelikdäki meýilnama gol çekdiler
Pakistan Yslam Respublikasynyň premýer-ministri Mian Muhammet Şehbaz Şerif penşenbe güni 8-nji iýunda Döwlet ministri – «Türkmengaz» döwlet konserniniň başlygy Maksat Babaýewiň ýolbaşçylygyndaky Türkmenistanyň wekiliýetini kabul etdi.
Duşuşykda türkmen tarapy Türkmenistan bilen Pakistanyň arasynda uly göwrümli bilelikdäki taslamalaryň durmuşa geçirilişi barada premýer- ministre habar berdi.
Premýer-ministr, ýurduň energetika zerurlyklaryny kanagatlandyrmakda möhüm orun tutjak TAPI gaz geçirijisiniň we TAP elektrik geçirijisiniň taslamalarynyň möhletinden öň tamamlanmagyna Pakistan hökümetiniň goldawyny tassyklady diýip, Yslamabatdaky Türkmen ilçihanasynyň metbugat beýanatynda aýdylýar.
Duşuşygyň ahyrynda Türkmenistanyň wekiliýeti we Mian Muhammet Şehbaz Şerif premýer-ministriň rezidensiýasynda bolan TAPI gaz geçiriji taslamasynyň çalt durmuşa geçirilmegi üçin Bilelikdäki meýilnamanyň gol çekişlik dabarasyna gatnaşdy.
Premýer-ministr dabarada çykyş edip, TAPI-iň sebitiň gülläp ösmegini üpjün etmek üçin örän möhüm taslamadygyny we sebitleýin hyzmatdaşlygyň täze döwrüni alamatlandyrjakdygyny aýtdy. «Biz TAPI-iň durmuşa geçirilmegini çaltlaşdyrmak üçin ähli tagallalary ederis»,- diýip Şerif belledi.
Bu Bilelikdäki meýilnama gol çekilmegi, her gatnaşyjy ýurt we umuman sebit üçin taryhy ähmiýete eýe bolan TAPI gaz geçirijisini durmuşa geçirmekde möhüm ädimdir.
ORIENT news
