TDHÇB-daky söwdalaşyklar: bahasy ABŞ-nyň $100 mln dollaryndan gowrak 30 geleşik baglaşyldy
Anna güni, 9-njy iýunda Türkmenistanyň Döwlet haryt-çig mal biržasyndaky söwdalaşyklarda jemi bahasy $105,7 mln amerikan dollaryna we 14,1 mln türkmen manadyna deň bolan 30 geleşik baglaşyldy – diýip, ORIENT-iň habarçysy habar berýär.
BAE-den we Owganystandan gelen telekeçiler tebigy gazdan öndürilen ECO-93 kysymly awtoulag benzininiň jemi 95 müň tonnasyny satyn aldylar. Önümiň her tonnasyna $645 amerikan dollary baha berildi, geleşikleriň jemi bahasy bolsa $61,2 mln amerikan dollaryna deň boldy.
Maltadan we BAE-den gelen kompaniýalar az kükürtli ýakylýan mazudyň 100 müň tonnasyny her tonnasyna $394,75 amerikan dollaryny berip satyn aldylar. Geleşikleriň jemi bahasy $39,4 mln amerikan dollaryna deň boldy. Gonkongdan we Ermenistandan gelen işewürler tüýjümek önümleriň dürli görnüşleriniň 62,5 müň kg $281,2 müň amerikan dollaryna satyn aldylar. Türkiýäniň işewür toparlarynyň wekilleri nah ýüplügiň dürli görnüşleriniň 2,2 mln kg $4,7 mln amerikan dollaryna satyn aldylar.
Içerki bazarda ýerli telekeçiler SN-350 kysymly esasy ýagyň 103 tonnasyny 1,4 mln ТМТ we TPP D 30 S kysymly polipropileniň 496,6 tonnasyny 12,6 mln TMT satyn aldylar.
