Türkmenistan bilen Koreýanyň arasyndaky gatnaşyklar iki ýurduň diplomatlarynyň Nýu-Ýorkdaky duşuşygynyň mowzugy boldy
Duşenbe güni 5-nji iýunda, Nýu-Ýorkda Türkmenistanyň BMG-daky hemişelik wekili Aksoltan Ataýewanyň Koreýa Respublikasynyň Daşary işler ministrliginiň köptaraplaýyn gatnaşyklar ministriniň orunbasary Ýongmin Park bilen duşuşygy geçirildi.
Türkmenistanyň BMG-daky hemişelik wekilhanasynyň sahypasynda habar berlişi ýaly, duşuşykda ikitaraplaýyn hyzmatdaşlyk, şeýle hem halkara guramalarynyň, esasanam BMG-nyň çäginde iki ýurduň özara gatnaşygy barada konstruktiw pikir alyşyldy.
Diplomatlar BMG-nyň Howpsuzlyk Geňeşiniň hemişelik däl agzalarynyň 2024- 2025-nji ýyllar aralygyndaky saýlawlary, hususan-da Koreýa Respublikasynyň dalaşgärligi bilen baglanyşykly meseleleri ara alyp maslahatlaşdylar.
Ministriň orunbasary Koreýa Respublikasynyň Geňeşe saýlan halatynda aşakdaky ugurlara aýratyn üns bermegi meýilleşdirýändigini aýtdy: parahatçylygy goramak we parahatçylygy gurmak; zenanlar, parahatçylyk we howpsuzlyk; kiberhowpsuzlyk; howanyň üýtgemegi we daşky gurşawyň howpsuzlygy.
Aksoltan Ataýewa Ýongmin Parka ýetip gelýän saýlawlarda üstünlik arzuw etdi we Koreýa Respublikasynyň Howpsuzlyk Geňeşiniň agzasy hökmünde sebit we dünýä derejesinde parahatçylygy hem-de howpsuzlygy berkitmek üçin ähli tagallalary etjekdigine umyt bildirdi.
Ilçi, BMG-nyň Baş Assambleýasynyň Türkmenistan tarapyndan öňe sürlen rezolýusiýalaryny goldaýandygy we Koreýa Respublikasynyň wekiliniň «Merkezi Aziýanyň parahatçylyk, ynam we hyzmatdaşlyk zolagy» 77-nji sessiýanyň gün tertibiniň 61-nji maddasy boýunça şu ýylyň 16-njy maýynda Baş Assambleýanyň çekişmelerinde eden çykyşy üçin Koreýa Respublikasynyň hökümetine minnetdarlyk bildirdi.
Ataýewa şu ýyl Türkmenistanyň nobatdaky «Merkezi Aziýa - Koreýa Respublikasy» ministrler forumyny geçirjekdigini belläp, Aşgabadyň Seul bilen sebitara we ikitaraplaýyn esasda özara peýdaly we köptaraplaýyn gepleşikleri dowam etdirjekdigini nygtady.
ORIENT news
