Türkmen modelýerleri Tajikistan Fashion Week görkezilişine gatnaşýarlar
Türkmenistandan bolan modelýerler sişenbe güni Duşenbede açylan Tajikistan Fashion Week Modanyň halkara hepdesiniň 10-njy möwsümine gatnaşýarlar.
Täze möwsüm halklaryň dostlugy temasyna bagyşlanandyr. Moda hepdesiniň birinji gününde «Dushanbe Serena» otelindäki podiumda Türkmenistandan SG Exclusive modelýer debýut çykyşyny görkezdi.
Tajikistan Fashion Week görkezilişinde üç günüň dowamynda Türkiýeden, Gazagystandan, Russiýadan, Özbegistandan we beýleki ýurtlardan 30-a golaý dizaýnerler we brendler zenan, erkek we çagalar lybaslarynyň ýygyndysyny görkezerler. Guramaçylar çäräniň sebitiň ýurtlarynyň arasynda medeni gatnaşyklaryň pugtalanmagyna ýardam etjekdigine umyt bildirýärler.
Täjigistanda Modanyň halkara hepdeligi ýurduň Senagat we täze tehnologiýalar ministrliginiň goldaw bermeginde 2018-nji ýyldan bäri geçirilýär. Türkmen dizaýnerleri ozal hem Tajikistan Fashion Week görkezilişine gatnaşypdylar.
ORIENT habarlar
