Türkmenistanyň diplomatik wekilhanasy Magtymgulynyň goşgularynyň italýan dilindäki birinji ýygyndysy bilen tanyşdyrar
Türkmenistanyň Italiýadaky ilçihanasy Magtymguly Pyragynyň goşgularynyň italýan dilindäki ilkinji ýygyndysynyň tanyşdyrylyşyny geçirmegi meýilleşdirýär. Bu barada medeniýet we KHBS boýunça türkmen hökümetiniň wise-premýeri Mährijemal Mämmedowa özüniň Italiýa saparynyň barşynda beýan etdi – diýip, ýurduň daşary syýasat edarasy habar berýär.
Şunuň bilen birlikde, resmi duşuşyklarda iki ýurduň arasynda medeni-ynsanperwer hyzmatdaşlygy, şol sanda ýurdumyzda tapylan gadymy artefaktlaryň we türkmen halkynyň maddy we ruhy gymmatlyklarynyň ekspozisiýalaryny italýan muzeýlerinde görkezmek arkaly hyzmatdaşlygy ösdürmegiň geljegi ara alnyp maslahatlaşyldy.
Şeýle hem wise-premýer M. Mämmedowanyň baştutanlygyndaky Türkmenistanyň wekilçilikli wekiliýeti italýan kärdeşleri bilen 2024-nji ýylda beýik şahyr Magtymguly Pyragynyň 300 ýyllygyny baýram etmäge bagyşlanan bilelikdäki çäreleriň geçirilmegini ara alyp maslahatlaşdy. Ozal wise-premýeriň Italiýanyň medeniýet ministri Jennaro Sandžuliano bilen duşuşygy barada habar berlipdi.
ORIENT habarlar
