Türkmen küştçisi Merkezi Aziýa bilen Owganystanyň çempionatynda «bürünç» gazandy
Halkara ussat Saparmyrat Atabaýew Duşenbede tamamlanan zonal çempionatda üçünji orny eýeledi. Zona 3.4 Aziýa küşt federasiýasyny düzýän we Merkezi Aziýanyň bäş ýurduny we Owganystany öz içine alýan sekiz zonanyň biridir.
Üç küştçi, mümkin bolan 9-dan 6.5 nutuk toplap, açyk (erkekler) ýaryşynda birinji orny paýlaşdy. Bular özbek grossmeýsteri Nodirbek Ýakubboýew (FIDE reýting - 2630), Gazagystanyň halkara ussady Alişer Süleýmenow (2471) we Türkmenistandan Saparmyrat Atabaýew (2433). Goşmaça koeffisiýente görä, Özbegistanly Olimpiýa çempiony birinji setirde, Saparmyrat bolsa üçünji ýer bilen kanagatlanmaly boldy.
Gynansakda, Saparmyrat iýul aýynyň ahyrynda Bakuwda başlamaly Dünýä çempionatyna gatnaşmak üçin bary-ýogy bir ädim yzda galdy. Ondan başga-da, erkekler kategoriýasynda Türkmenistana doganlar-grossmeýsterler Maksat we Ýusup Atabaýewler, şeýle hem FIDE ussady Azat Nurmämmedow wekilçilik etdi. Olaryň hemmesi ýaryşy 9-dan 4,5 nutuk bilen tamamladylar.
Şeýle hem ýaryşa Rinat Jumabaýew (2590) we Murtas Kažgalew (2506, ikisi hem Gazagystanly) ýaly beýleki meşhur grossmeýsterler gatnaşdy. Jemi erkekler kategoriýasyna 3.4 zonanyň iň oňat 26 küştçisi gatnaşdy.
Küşt federasiýalarynyň dünýä reýtinginde 1-nji iýuna çenli Özbegistanyň erkekler topary 18-nji ýerde (Aziýada 3-nji), Gazagystan 45-nji, Türkmenistan 67-nji, Gyrgyzystan 75-nji, Täjigistan 90-njy orunda gelýar.
Ýaryşyň zenanlar kategoriýasynda biziň ýurdumyza Läle Şöhradowa, Merýem Agajanowa we Ogulsuraý Baýrambaýewa wekilçilik etdi. Bu ýerde Gazagystanyň türgenleri ýaryşyň soňky ýagdaýynda ilkinji 6 setirde jemlendiler.
Halkara arenasyndaky ilkinji tejribesine garamazdan, gatnaşyjylarymyzyň arasynda iň gowy netijäni mümkin bolan 9-dan 5 nutuk toplap, 9-njy orny eýelän Ogulsuraý Baýrambaýewa görkezdi. Şeýle hem ol öz Elo reýtingini 40 nutuk ýokarlandyrmagy başardy.
ORIENT news
