Aşgabatda Türkmenistanyň Çagalar gaznasy tarapyndan çagalar üçin baýramçylyk çäresi guraldy
Penşenbe güni paýtagtymyzdaky “Aşgabat” seýilgähi ýöriteleşdirilen we kömekçi mekdep-internatlarynda, birnäçe mekdebe çenli ýaşly çagalar edaralarynda we köp çagaly maşgalalarda terbiýelenýän çagalar üçin uly baýramçylyk meýdançasyna öwrüldi. Şowhunly çäre her ýyl 1-nji iýunda bütin dünýäde bellenip geçilýän Çagalary goramagyň halkara gününe bagyşlandy. Aşgabadyň ýaşajyk ýaşaýjylary üçin bu çäräni Türkmenistanyň Magtymguly adyndaky Ýaşlar guramasynyň Merkezi geňeşiniň ýanyndaky Çagalar gaznasynyň işgärleri guradylar.
Çagalar gyzykly hem täsirli maksatnama gatnaşdylar, olar hiňňildiklerde uçdular, akyl-paýhas, sport we döredijilik bäsleşiklerine gatnaşdylar, asfaltyň ýüzüne çekilen suratlaryň bäsleşigi dürli ýaşdaky çagalary özüne çekýän aýratyn özboluşly çärä öwrüldi. Şeýle hem çagalar üçin gyzykly we özüneçekiji oýunlar guraldy, olara dürli görnüşli süýjülikler, buzgaýmak we ş.m. hödürlendi.
Türkmen raýatlarynyň sanyny köpeldip, 1-nji iýunda täze dünýä inen bäbejikler we olaryň ejeleri-de ünssüz galdyrylmady. Olar Çagalar gaznasyndan sowgat toplumlaryny alarlar.
ORIENT news
