Türkmen ÝOM-i “Times Higher Education” dünýä reýtingine girdi
Halkara ynsanperwer ylymlary we ösüş uniwersiteti “Times Higher Education” (THE) abraýly bilim guramasy tarapyndan düzülen “The Impact Rankings 2023” jemleýji sanawyna girizildi.
Reýting ýokary okuw mekdeplerine Durnukly ösüş maksatlaryna (DÖM) laýyklykda baha berilýän netijeliligiň global tablisasydyr.
Uniwersitetiň wekilleriniň ORIENT-iň habarçysyna beren habaryna görä, Halkara ynsanperwer ylymlary we ösüş uniwersiteti aşakda görkezilen Durnukly ösüş maksatlarynyň durmuşa geçirilmegine gatnaşdy:
• 4-nji maksat - Ýokary hilli bilim;
• 5-nji maksat - Gender deňligi;
• 15-nji maksat - Guryýer ekosistemalaryny gorap saklamak;
• 17-nji maksat - Maksatlara ýetmek üçin hyzmatdaşlyk.
Sanawyň netijeleri ÝOM-leriň alyp barýan işiniň esasy dört ugrunyň: mugallymçylyk, ylmy iş, dolandyryş we maglumat-düşündiriş işini öz içine alýan hemmetaraplaýyn we deňagramly deňeşdirmäni üpjün etmek maksady bilen netijelilik ölçeglerini ulanmak arkaly hasaplanýar.
Bu reýting 2018-nji ýyldan bäri her ýyl geçirilýär we eýýäm ýeterlik derejede meşhurlyk gazandy. Ol uniwersitetleriň BMG-niň DÖM-lerine ýetmekde gazanan üstünliklerine esaslanýan ÝOM-leriň jemgyýete edýän täsirini görkezýär.
The Impact Rankings gurluş taýdan dinamiki bolup, sany ýyl geldikçe artýar, sebäbi DÖM-lere ýetmekde ygrarlydygyny görkezmäge çalyşýan uniwersitetler köpelýär.
Times Higher Education (THE) guramasynyň her ýyl žurnalynda çap edýän reýting maglumat binýadyna uniwersitetleriň girizilmegi ýokary okuw mekdeplerine täze dolandyryş usullaryny girizmek we ösüşleriniň has aýdyň we açyk maglumatlaryny bermek bilen öz işlerinde çalt we ýokary hilli kämilligi görkezmäge mümkinçilik berýär.
The Impact Rankings 2023 jemleýji sanawyna 112 ýurtdan 1591 ýokary okuw mekdebi girdi. Umumy reýtingde Günbatar Sidneýiň Awstraliýa uniwersiteti yzly-yzyna ikinji ýyl birinji orny eýeleýär. Angliýanyň Mançester uniwersiteti ikinji ýerde, üçünji orunda bolsa Kanadanyň şa uniwersiteti ornaşdy.
ORIENT news
