Türkmenistanyň Daşary işler ministrliginde ÝHHG-nyň Baş sekretary bilen duşuşyk geçirildi
Türkmenistanyň Daşary işler ministrligi ÝHHG-nyň Baş sekretary Helga Şmid bilen duşuşyk geçirdi. Daşary işler ministriniň wezipesini wagtlaýyn ýerine ýetiriji Wepa Hajyýew myhman bilen Türkmenistan bilen ÝHHG-nyň syýasy we ykdysady ugurlarda, energetika we daşky gurşaw howpsuzlygy, parlament diplomatiýasyny ösdürmek, şeýle hem ynsanperwerlik meselesinde hyzmatdaşlygy ösdürmegiň geljegi barada pikir alyşdy.
«Türkmenistanyň halkara guramalary bilen hyzmatdaşlygynyň çäginde ÝHHG bilen uzak möhletleýin we netijeli hyzmatdaşlygyň aýratyn orny eýeleýändigi bellendi. Şol bir wagtyň özünde, guramanyň alyp barýan işleriniň syýasy, ykdysady we ynsanperwer ölçegleriniň çägindäki maksatlar we wezipeler, Türkmenistanda we Merkezi Aziýa sebitinde durmuşa geçirýän taslamalaryny we maksatnamalaryny kesgitlemekde Türkmenistan üçin ileri tutulýan ugurlardyr»,- diýip Türkmen DIM-niň habarynda aýdylýar.
Duşuşykda aýdylyşy ýaly, soňky ýyllarda Türkmenistan bilen ÝHHG-nyň arasynda energetika we daşky gurşaw howpsuzlygy, ulaglaryň arabaglanyşygy ýaly möhüm ugurlarda hyzmatdaşlyk kem-kemden ösdürildi.
Syýasy ölçegde ÝHHG bilen terrorçylyga garşy göreş, serhetaşa jenaýatçylyga, neşe gaçakçylygy, adam gaçakçylygy, zorlukly ekstremizm we radikalizasiýa howpy boýunça gazanylan netijeli hyzmatdaşlyk bellendi. Şol bir wagtyň özünde, kiberhowpsuzlyk pudagynda bilelikdäki hyzmatdaşlygy güýçlendirmek geljegi uly ugur hökmünde görkezilýär.
Diplomatlar soňky ýyllarda Türkmenistanyň Parlament Assambleýasy, Milli azlyklar boýunça Ýokary komissaryň edarasy, Demokratik guramalar we adam hukuklary edarasy we köpçülikleýin habar beriş serişdeleriň azatlygy ýaly ÝHHG- nyň guramalary bilen gatnaşyklarynyň ep-esli ýokarlanandygy barada ylalaşdylar.
Halkara we sebit syýasaty, sebitdäki howpsuzlyk we durnuklylyk meselelerinde pikir alyşmak geçirildi. Şunuň bilen baglylykda, ÝHHG-nyň ýolbaşçylygy sebit we halkara infrastruktura taslamalaryny durmuşa geçirmek we goňşy ýurda netijeli ynsanperwer kömegi bermek arkaly Türkmenistanyň ýagdaýy çözmek we Owganystandaky parahatçylygy dikeltmek ugrundaky tagallalaryny belläp geçdi.
Baş sekretar, Türkmenistanyň bitaraplyk syýasatynyň sebitde we onuň daşynda parahatçylygy, howpsuzlygy we durnukly ösüşi üpjün etmekdäki ornuny belläp geçdi. Hususan-da, Türkmenistanyň ÝHHG-nyň esasy ileri tutulýan ugurlary bilen baglanyşykly energetika we daşky gurşaw howpsuzlygy, durnukly ulag we suw diplomatiýasy babatdaky başlangyçlarynyň ähmiýeti görkezildi.
Wepa Hajyýew Türkmenistanyň Hazar deňzinde ýaşyl portlaryň we birikmäniň ösdürilmegini, sanlylaşdyrmagy, söwdany ýeňilleşdirmegi we Merkezi Aziýada we Kawkazda ulag we logistika ugurlaryny goldaýandygyny nygtady.
Şeýle hem ynsanperwer ugurda ÝHHG bilen hyzmatdaşlygyň Türkmenistandaky adam hukuklary boýunça Ygtyýarly wekiliniň Apparatynyň üsti bilen ösmegini dowam etdirýändigi bellenildi.
ORIENT news
