Türkmenistan Parižde medeni gymmatlyklary goramak baradaky ýygnaga gatnaşdy
Medeni gymmatlyklaryň bikanun importyny, eksportyny we eýeçilik hukugynyň geçirilmegini gadagan etmäge we öňüni almaga gönükdirilen çäreler baradaky 1970-nji ýyldaky konwensiýanyň gatnaşyjy döwletleriniň ýedinji mejlisi 30-njy maýda ÝUNESKO-nyň Pariždäki baş edarasynda geçirildi. Türkmenistanyň ÝUNESKO-daky hemişelik wekili Maksat Çaryýew forumda Türkmenistana wekilçilik etdi diýip, Türkmenistanyň Daşary işler ministrliginiň saýty habar berýär.
1970-nji ýyldaky konwensiýa medeni mirasy bikanun söwdadan we dolanşygyndan goramaga gönükdirilen halkara şertnamadyr. Ol medeni eserleriň ogurlanmagynyň we söwdasynyň öňüni almak üçin görkezmeleri we düzgünleri kesgitleýär.
Sessiýanyň açylyşynda ÝUNESKO-nyň Medeniýet boýunça baş direktorynyň orunbasary Ernesto Ottone Ramirez, konwensiýanyň täze agzalaryny - Türkmenistan we Malawi Respublikasyny garşy aldy we gutlady. Türkmenistanyň 2022-nji ýylyň 1-nji sentýabrynda ÝUNESKO-nyň bu konwensiýasyna goşulandygy bellärliklidir.
Maksat Çaryýew çykyşynda Türkmenistanyň diňe bir ajaýyp taryhyny we özboluşlylygyny görkezmän, eýsem dünýä medeni mirasynyň aýrylmaz bölegidigini görkezýän baý taryha we medeni mirasa eýedigini belledi.
Diplomat, Konwensiýanyň işiniň çäginde Türkmenistanyň diňe bir bu gymmatlyklary goramaga däl-de, eýsem olaryň ýaýramagyna hem goldaw bermäge çalyşýandygyny nygtady. Ilçi, konwensiýanyň doly agzasy hökmünde beýleki agza döwletler bilen işjeň hyzmatdaşlygy, medeni mirasy gorap saklamak babatynda yzygiderli bilim we tejribe alyşmagy öz üstüne alýandygyny aýtdy.
Pariž mejlisine gatnaşyjylar, şeýle hem, gatnaşyjy döwletleriň mejlisiniň kömekçi komiteti üçin saýlawlar geçirdiler.
ORIENT news
