Owganystan Türkmenistanda söwda wekilini belledi
Owganystanyň Söwda we senagat ministrligi Owganystanyň Aşgabatdaky ilçihanasynda söwda attaşesini belledi.
"Khaama Press" habarlar agentliginiň Owganystanyň Söwda ministrliginiň twitter maglumatyna salgylanyp berýän habaryna görä, Muhammet Harun Saýedi Owganystanyň Aşgabatdaky ilçihanasynyň söwda wekili hökmünde resmi taýdan tanyşdyryldy. Dabara Owganystanyň Türkmenistandaky ilçisiniň wezipesini wagtlaýyn ýerine ýetiriji Fazal Muhammet Sabir we başga-da birnäçe maýadarlar gatnaşdy.
Sabir söwda we maýa goýumlaryny höweslendirmekde, şeýle hem ýakyn ýyllarda Owganystan bilen Türkmenistanyň arasynda ykdysady gatnaşyklary we hyzmatdaşlygy ösdürmekde attaşeniň möhüm ornuny belledi.
"Khaama Press" agentligi Türkmenistanyň Owganystany täzeden gurmak ugrundaky tagallalaryna ünsi çekip, ýurduň Owganystanyň halkyna möhüm kömek iberendigini we de-fakto häkimiýetleri birnäçe gezek inklýuziw hökümet gurmaga we aýal-gyzlaryň, dini azlyklaryň we etnik toparlaryň hukuklaryna hormat goýmaga çagyrandygyny aýtdy.
Owganystanyň Söwda we senagat ministrligi söwda attaşeleriniň Pakistanda we Eýranda hem bellenendigini we ýakyn wagtda Stambulda-da bellenilmegine garaşylýandygyny aýtdy.
ORIENT news
