Türkmenistanyň Brýusseldäki ilçihanasy Bütindünýä welosiped gününi belleýär
Türkmenistanyň Belgiýadaky ilçihanasy Brýusselde Bütindünýä welosiped güni mynasybetli köpçülikleýin welosiped ýörişini guraýar. Ilçihanada: "Bu her ýyl geçirilýän çäre sagdyn durmuş ýörelgesini, daşky gurşawy goramak düşünjesini, halklaryň arasyndaky dost-doganlyk ruhuny kämilleşdirmek üçin ajaýyp mümkinçilikdir" – diýip bellediler.
Welosipedçileriň ýörişi 2-nji iýunda Bois de la Kambre atly ajaýyp tokaý seýilgähinde geçiriler. Tigirçiler seýilgähde ýerleşýän adybir kölüň daşyndan aýlaw ederler.
Belgiýanyň paýtagtynyň ýaşaýjylaryny we myhmanlaryny baýramçylyk çäresine çagyrmak bilen, diplomatik wekilhana dostlukly bäsdeşlik duýgusyny höweslendirmek üçin pellehana ýeten welosipedçilerň ilkinji üçlügine baýraklaryň gowşuryljakdygyny habar berdi. Şeýle hem höweslendiriji sowgatlar bolar.
3-nji iýunda bellenilýän Bütindünýä welosiped güni BMG Baş Assambleýasy tarapyndan 2018-nji ýylyň aprelinde ykrar edildi. Her ýyl köpçülikleýin welosiped ýörişini guraýan Türkmenistan bu senäni ykrar etmek başlangyjyny öňe sürdi. Baýramçylyk çäreleri daşary ýurtlardaky beýleki türkmen ilçihanalary tarapyndan hem geçirilýär.
ORIENT news
