“Türkmenhowaýollary” London bilen Hanoýyň arasynda Aşgabadyň üsti bilen ýük gatnawlaryny amala aşyrar
“Türkmenhowaýollary” Beýik Britaniýa bilen Wýetnamyň arasynda açylan ilkinji ýük ugry boýunça Türkmenistanyň üstünden üstaşyr gatnawlary amala aşyrar.
Wýetnam habarlar gullygynyň berýän habaryna görä, täze ugruň açylýandygy barada 19-njy maýda Angliýa we Wýetnam bazarlaryna hyzmat etmekde ýöriteleşen TT Meridian halkara söwda we logistika kompaniýasy yglan etdi.
Kompaniýa 30 tonna ýük göterijiligi bolan A330 uçarlaryny ulanýar.
“Türkmenhowaýollary” tarapyndan her hepde ýerine ýetirilýän TT Meridian ýük gatnawlary mundan beýläk her çarşenbe güni agşam Londonyň Stansted howa menzilinden ugrar, penşenbe güni irden Aşgabat halkara howa menzilinden uçup, şol gün öýlän NoiBai Hanoi halkara howa menziline gonar (ähli ýerde ýerli wagt). Yzyna gaýdyş wagty has dowamly – uçar penşenbe güni agşam Hanoýdan ugrar we indiki hepdäniň çarşenbe güni irden Stansted howa menziline gonar (ýola sarp edilýän wagt - 5-6 gün).
Şeýle-de habarda soňky birnäçe hepdäniň dowamynda bu ugurda birnäçe synag uçuşynyň bolandygy bellenilýär.
ORIENT news
