Bilermen Türkmenistanyň halkara konstitusion hukugynyň ösüşine goşandy hakynda gürrüň berdi
Türkmenistanyň Konstitusiýasyny öwrenmekde we ony dünýäniň köp ýurtlarynyň konstitusiýalary bilen deňeşdireniňde türkmen döwletiniň Esasy kanunynyň konstitusion hukugyň nazaryýetiniň we amalyýetiniň ösüşine möhüm goşant goşup, köp meseleler boýunça halkara ölçeglerine gabat gelýändigini ynam bilen aýtmak bolýar.
Bu barada CentralAsia.news neşiri üçin beren synynda hukuk ylymlarynyň doktory, professor, Türkmenistanyň at gazanan hukukçysy we hormatly il ýaşulysy Myrat Haýytow ýazýar.
Kanunyň hökmürowanlygy, häkimiýetiň kanun çykaryjy, ýerine ýetiriji we kazyýet şahalaryna bölünmegi, şeýle hem ýurduň Konstitusiýasynda berkidilen ýerli öz özüňi dolandyryşyň ykrar edilmegi ýaly esasy gymmatlyklar bu gün dünýä jemgyýetçiliginiň mynasyp agzasy hökmünde häzirki zaman Türkmenistanyň ýüzüni kesgitleýär – diýip, bilermen nygtaýar.
«Bu gün häzirki zaman Türkmenistan häkimiýetleriň bölünme ýörelgelerine we halkyň ygtyýarlyklaryny onuň wekillerine geçirmek ýörelgelerine esaslanýan ýokary döwlet dolandyryşynyň täze ulgamynyň emele geliş tapgyrynda barýar» -diýip, awtor ýazýar.
Bu gün Türkmenistanyň Konstitusiýasy dünýä jemgyýetçiliginiň döwletleriniň deňhukukly subýekti hökmünde ýurduň mundan beýläkki ösüşiniň geljegini beýan edýär we döwlet gurluşynyň ähli düzüm bölekleriniň, häkimiýetiň we halkyň özara gatnaşyklarynyň bir bitewi mehanizmini döredýär – diýip, Haýytow sözüni jemledi.
ORIENT habarlar
