Maryda, Balkanabatda we Türkmenbaşyda nebitgaz pudagynyň işgärleri üçin täze ýaşaýyş jaýlary gurlar
Ýurdumyzda nebitgaz pudagynyň işgärleri üçin durmuş we ýaşaýyş infrastrukturasyny ösdürmek anna güni Ministrler Kabinetiniň mejlisinde Prezident Serdar Berdimuhamedowyň garamagynda bolan amaly meseleleriň biri boldy. Ýurdumyzyň welaýatlarynda döwrebap ýaşaýyş toplumlarynyň gurluşygy boýunça meýilleşdirilen işler barada Ministrler Kabinetiniň Başlygynyň orunbasary Guwanç Agajanow hasabat berdi.
Bu maksatnamanyň esasy desgalarynyň biri Mary şäherinde guruljak, jemi 720 maşgala niýetlenen giň gerimli ýaşaýyş toplumy bolar. Gurluşygyň birinji tapgyrynyň çäklerinde bu ýerde sekiz sany dört gatly ýaşaýyş jaýy — dört sany 40 öýli we dört sany 24 öýli jaý gurlar. Şeýlelikde, pudagyň 256 maşgalasyny täze, amatly ýaşaýyş jaýlary bilen üpjün etmek göz öňünde tutulýar.
Şol bir wagtda Balkanabat şäherinde 240 maşgala niýetlenen on sany dört gatly ýaşaýyş jaýyny gurmak meýilleşdirilýär. Türkmenbaşy şäherinde bolsa 72 öýden ybarat bolan on iki gatly köp öýli ýaşaýyş jaýy peýda bolar.
Bu taslama nebitgaz pudagynyň önümçilik üstünliklerini onuň gündelik işini üpjün edýän işgärleriň ýaşaýyş-durmuş şertleriniň hil taýdan gowulandyrylmagy bilen gönüden-göni baglanyşdyrmaga gönükdirilendir.
