Türkmen mekdep okuwçylary himiýa boýunça 57-nji Halkara olimpiadasynda dört medal gazandylar
Türkmen okuwçylary Astanada (Gazagystyan) geçen 57-nji Halkara Mendeleýew olimpiadasynda dört medal — bir kümüş we üç bürünç medal gazandylar – diýip, «Türkmenistan» gazeti habar berýär.
Iri halkara intellektual ýaryşda Türkmenistana paýtagtyň S.Türkmenbaşy adyndaky ýöriteleşdirilen umumybilim berýän mekdep-internatynyň dört okuwçysy wekilçilik etdiler, olaryň her biri medala mynasyp boldy.
Şeýlelikde, Begzada Annaýew kümüş medala mynasyp boldy. Ýakup Annaorazow, Yhlas Jumaýew we Aýgül Atajanowa bürünç medallaryň eýeleri boldular.
Moskwanyň M.W. Lomonosow adyndaky döwlet uniwersiteti tarapyndan (Russiýa Federasiýasy) guralan intellektual görkeziliş Russiýa, Gazagystan, Awstriýa, Azerbaýjan, Ermenistan, Belorussiýa, Bolgariýa, Wengriýa, Ysraýyl, Gyrgyzystan, Makedoniýa, Mongoliýa, BAE, Saud Arabystany, Siriýa, Täjigistan, Türkmenistan, Türkiýe, Özbegistan, Horwatiýa we Braziliýa ýaly ýurtlardan 113 ýaş himikleri ýygnady.
Olimpiada alty gün dowam etdi we üç tapgyrdan ybarat boldy: iki nazary we bir amaly tapgyr. Birinji tapgyryň ýumuşlary kynlygy boýunça ýöriteleşdirilen himiýa synplarynyň maksatnamasyna gabat gelýärdi. Ikinji tapgyrda gatnaşyjylara himiýanyň bäş bölüminden ybarat bolan has ýokary derejeli ýumuşlary teklip etdiler: organiki, organiki däl, analitiki we fiziki himiýa, şeýle hem haýwanlar baradaky ylymlar.
Dowamlylygy bäş sagat bolan olimpiadanyň amaly tapgyry okuwçylaryň himiýa laboratoriýasynda işlemek başarnyklaryny barlamaga gönükdirildi: jisimleriň himiki seljermesini ýerine ýetirip bilmek ukyby we hödürlenen usul boýunça sintez geçirip bilmek başarnyklary barlandy.
ORIENT habarlar
