ÝB-niň wekili Balkanabatdaky Adam hukuklary boýunça maglumatlar merkezine okuw gollanmalaryny berdi
Türkmenistandaky ÝB-niň wekilhanasynyň birinji maslahatçysy Renata Wrubel Türkmenistan bilen ÝB-niň arasynda diplomatik gatnaşyklaryň ýola goýulmagynyň 30 ýyllygy mynasybetli Balkan welaýatyna amala aşyryan saparynyň çäklerinde Ýagşygeldi Kakaýew adyndaky Halkara nebit we gaz uniwersitetiniň şahamçasynda ýerleşýän Adam hukuklary boýunça maglumatlar merkeziniň işi bilen tanyşdy we merkeze degişli gollanmalary berdi.
Renata Wrubel tarapyndan sowgat berlen okuw materiallary ähli isleg bildirýän ýerli ýaşaýjylar üçin açyk bolan maglumatlar merkeziniň üsti bilen adam hukuklary baradaky maglumata elýeterligini giňeltmäge gönükdirilendir.
Ýagşygeldi Kakaýew adyndaky Halkara nebit we gaz uniwersitetiniň şahamçasynyň mugallymlarynyň gürrüň bermegine görä, Adam hukuklary boýunça maglumatlar merkezi yzygiderli tertipde işleýär we myhmanlara ýöriteleşdirilen edebiýatlara elýeterliligi üpjün edýär.
Merkez 2011-nji ýylda açyldy. Onuň işine — «Adam hukuklaryna goldaw bermekde we goramakda Türkmenistanyň milli mümkinçiliklerini pugtalandyrmak» atly ÝB-niň, BMGÖM-nyň we Adam hukuklary boýunça Ýokary komissarynyň müdiriýetiniň bilelikdäki taslamasynyň çäklerinde goldaw berilýär.
ORIENT habarlar
