Dohada Türkmenistan bilen Kataryň arasynda atçylyk pudagyndaky hyzmatdaşlygy giňeltmek meselesi ara alnyp maslahatlaşyldy
Doha şäherinde iki ýurduň wekilleri Türkmenistan bilen Katar döwletiniň arasynda atçylyk pudagyndaky hyzmatdaşlygy ara alyp maslahatlaşdylar. Gepleşiklerde türkmen wekiliýetine Halk atşynasy we Aba Annaýew adyndaky Halkara atçylyk akademiýasynyň rektory Pygy Baýramdurdyýew ýolbaşçylyk etdi. Iş sapary 5-10-njy maý aralygynda Türkmenistanyň Katardaky ilçihanasynyň goldawynda geçirilýär.
Gürrüň atlary köpeltmek, çapyksuwar mekdebi, weterinariýa arassaçylygy, lukmançylyk we atçylyk sportyna gözegçilik etmek barada boldy. Atçylyk pudagynda bilim maksatnamalary we bu pudakda işlemek üçin hünärmenleri taýýarlamak hem türkmen we arap bilermenleriniň mejlisiniň mowzugy boldy.
Hususan-da, taraplar hünärmen atşynaslary taýýarlamak bilen meşgullanýan öňdebaryjy uniwersitetleriň tejribesini we ülňülerini göz öňünde tutup, iň gowy okuw usullaryny hem-de meýilnamalaryny gözden geçirdiler. Aýratyn mesele, Türkmenistanyň atçylyk pudagynda-da, oba hojalygynda-da isleg bildirýän başarnykly weterinarlary taýýarlamagyň zerurlygy boldy.
Doha iş saparynyň çäginde Türkmen wekiliýeti Katar döwletiniň Atçylyk sport federasiýasynyň prezidenti Bader Mohammed Al Darwiş we «Gelejegiň atşynaslary» atçylyk tälim merkeziniň müdiri Abdulla Mohammed Al Marri bilen gepleşikler geçirdi. Taraplar atlary köpeltmek we münmek, tejribe alyşmak, şeýle hem atşynaslar we çapyksuwarlar üçin bilelikdäki çäreleri hem-de türgenleşikleri geçirmek mümkinçiligini ara alyp maslahatlaşdylar.
ORIENT news
