Türkmenistan we Irlandiýa BMG-de hyzmatdaşlygy berkitmek barada ylalaşdylar
Türkmenistanyň BMG-däki hemişelik wekilhanasynda ilçi Aksoltan Ataýewanyň Irlandiýanyň BMG-däki hemişelik wekili Fergal Miten bilen duşuşygy geçirildi.
Diplomatlar BMG-nyň çäginde iki ýurduň arasyndaky hyzmatdaşlygyň ileri tutulýan ugurlary, ýagny parahatçylygy goraýyş proseslerine gatnaşmagy işjeňleşdirmek, howanyň üýtgemegine garşy göreş we suw çeşmelerini dolandyrmak ýaly meseleler barada pikir alyşdylar.
Taraplar Türkmenistan bilen Irlandiýanyň bitarap döwletler we Bitaraplygyň dostlar toparynyň agzalary hökmünde halkara gatnaşyklarynda parahatçylygy we ynamy berkitmäge, şol sanda Birleşen Milletler Guramasynyň çäginde gatnaşyklary pugtalandyrmaga aýratyn üns berýändiklerini bellediler – diýip, Türkmenistanyň BMG-däki hemişelik wekilhanasynyň saýtynda habar berilýär.
Irlandiýa Ikinji jahan urşy döwründe bitaraplygyny yglan etdi. Ýurduň şol wagtky premýer-ministri Eýmon de Walera bu statusy ýurduň beýik kuwwatly döwletleriň oýunlarynda pyýadanyň rolunda bolmagyna mümkinçilik bermezlik üçin diýip esaslandyrdy.
Parahatçylyk, howpsuzlyk we ösüş üçin bitaraplygyň dostlar topary 2020-nji ýylda Türkmenistanyň başlangyjy bilen BMG-nyň ýanynda halkara syýasy ýagdaýy gowulandyrmak üçin bitaraplyk institutynyň ulanylyşyny giňeltmek maksady bilen döredildi.
ORIENT news
